Архангай аймгийн Өлзийт суманд болсон хурдан морины уралдааны үеэр зургаан настай хүүхэд мориноос унаж, амиа алдсан талаар бид мэдээлсэн билээ. Тодруулбал, долдугаар сарын 1-нд болсон уралдааны үеэр талийгаач хүү эмнэлгийн тусламж авч чадалгүй, газар дээрээ барсан юм.

      Албаны хүмүүсийн хэлснээр “Хурдан морины уралдаанд 20 гаруй уяач, унаач хүүхэд оролцсон. Өлзийт сумын уяачдаас гадна Өгийнуур багийн 4-5 уяач морьтойгоо ирсэн. Амиа алдсан унаач хүүхэд нь Өгийнуур сумынх. Эрүүл мэндийн төвд “Хүүхэд мориноос уналаа” гэсэн дуудлага ирж, хоёр эмч очиход хүү газар дээрээ нас барсан байсан гэсэн юм.

        Мөн өөр эх сурвалжийн мэдээлснээр “Өлзийт сумын Ямаат багийн эмч морины уралдаан болж байгааг мэдэж, сумын Эрүүл мэндийн төв мэдэгдсэн. Эрүүл мэндийн төвийнхөн сумын ЗДТГ болон цагдаагийн байгууллагад мэдэгдэж, морины уралдаан болж байгаа газарт очсон. Очиход их насны морь уралдааны замд гарсан байсан. ЗДТГ-ын машин ирж явааг харсан уяачид зугтааж, их насны морьдоо буцаасан юм билээ. Тэгээд хүүгийн морь бүдэрч, хүү унасан” гэсэн билээ.

Харин бид талийгаач хүүгийн ээжтэй утсаар холбогдож, тухай үед юу болсон талаар тодрууллаа. Тэрбээр “Бид мал маллаж хөдөө амьдардаг. Хүү маань хамаатныхаа ахын мориноос унаж, нас барсан. Манайх дөрвөн хүүхэдтэй бөгөөд талийгаач хүү минь зургаан настай, хамгийн бага нь байсан. Хүү минь өнгөрсөн хавар уралдааны морь унаж сурсан. Өөрөө дур сонирхолтой, аав нь уяач учраас хүүгээ уралдааны морь унахыг хориглоогүй. Талийгаач хүү минь төлөв даруу зантай, дуу цөөтэй хүүхэд байсан. Хүүг авч явсан уяач нь манай хажууд ойрхон амьдардаг. Хэрэг гарах үед бид байгаагүй болохоор сайн мэдэхгүй байна. Хүүг нас барсны дараа “Морь нь бүдрээд, хоёр километр газар чирэгдэж, унасан байсан” гэж л хэлсэн. Өөр зүйл мэдэхгүй байна. Цагдаагийн байгууллагаас нөхөр бид хоёрыг дуудаж тайлбар, мэдүүлэг аваагүй” гэлээ.