Сэлэнгэ аймгийн Шаамар сумын Эрүүл мэндийн төвийн дарга Б.Бат-Эрдэнэ 31 настай эрэгтэй Б коронавирусийн халдвар авсан нь батлагдан, тус эмнэлэгт хэвтэн эмчлүүлж байсан 14 настай охиныг хүчирхийлэхийг завдсан тухай гомдлыг охины ар гэрийнхэн цагдаагийн байгууллагад гаргасан байдаг.

Энэ талаар Шаамар сумын Эрүүл мэндийн төвийн дарга Б.Бат-Эрдэнээс тухай үед буюу долдугаар сарын 8-нд тодруулахад “Би 14 настай охины биед хүрээгүй.Цагдаагийн байгууллагаас хэргийг шалгаж, хэлмэгдүүлэлт, буруу ойлголт гэдгийг тогтоож байгаа байх. Охины аав, ээж буруу ойлгож, үл ойлголцол үүссэн. 14 настай охины ковид эдгэрч, эмнэлгээс гарсан” гэсэн юм.

Харин түүнд холбогдох хэргийг хааж, хэрэгсэхгүй болгожээ. Энэ талаар Шаамар сумын Эрүүл мэндийн төвийн дарга Б.Бат-Эрдэнээс тодрууллаа. Тэрбээр “14 настай охин биед нь үзлэг хийх явцыг хүчирхийлэх гэж байна хэмээн ойлгосон юм шиг байна лээ. Шаардлагатай тохиолдолд би эмчийн хувьд биед нь хүрч, үзлэг хийх ёстой. Охин ар гэрийнхэндээ буруу мэдээлэл өгсөн гэдэг нь цагдаагийн байгууллагын мөрдөн шалгах ажиллагаагаар тогтоогдсон. Өөрөөр хэлбэл, цагдаагийн байгууллагаас намайг буруугүй, бага насны хүүхэд хүчирхийлэх гэж байсан гэдэг нь худал цуурхал, гэмт хэргийн шинж чанаргүй гэсэн дүгнэлт гарсан. Би охины ар гэрийнхэнтэй уулзаагүй, уулзах шаардлагагүй гэж бодож байна” гэв.