Зэсийн үнэ сүүлийн есөн жилд анх удаа 9000 ам.доллар давж, Лондоны металлын бирж дээр энэ сарын 22-нд 9187 ам.долларт хүрсэн. Өнгөрсөн 2020 гуравдугаар сарын 23-нд зэсийн үнэ нэг тонн нь 4774 ам.доллар байсан бол ердөө 11 сарын хугацаанд 9158 ам.доллар болж, 191.8 хувиар өслөө. Зэсийн үнийн уг өсөлт Монгол Улсын хувьд маш таатай мэдээлэл бөгөөд энэ боломжийг алдалгүй “атгах” ёстойг анхааруулж байгаа юм.

2021 оны улсын төсөвт зэсийн үнийг 6500 ам.доллар байхаар төсөөлж, цэвэр зэсийн орлогоос 1.5 их наяд төгрөгийг төсөвт төвлөрүүлнэ гэж тооцоолсон. Зэсийн үнэ 9000 ам.доллар дээр тогтвортой байна гэж үзвэл манай улсад эдийн засгийн томоохон сэргэлт, боломж бий болно. Эдийн засагч, судлаачид зэсийн үнийг ойролцоогоор 9000 ам.доллараас дээш гаргаж ханшаа түгжиж чадвал 2.0 их наяд давсан орлого олох боломжтой гэж үзэж буй. Хэрэв энэ боломжийг ашиглаж чадвал эдийн засгаа хөл дээр нь босгож, аж ахуйн нэгж байгууллага, жижиг дунд үйлдвэрлэл эрхлэгч, иргэдэд бодит дэмжлэг болж чадах юм.

Тэгвэл бид зах зээлийн энэ боломжийг хэрхэн ашиглах вэ:

Эдийн засагч Д.Амгалан уг боломжийг ашиглахын тулд юуг анхаарах ёстойг “Богино, дунд хугацаандаа худалдах ханшаа дэлхийн зах зээлийн ханшаар тогтооход анхаарах. Өөрөөр хэлбэл, цэвэр зэсээ дэлхийн зах зээлийн үнэд ойролцоо гэхээс илүүтэй ижил ханшаар, зэсийн баяжмалын үнээ дэлхийн зах зээлийн ханшаас 23- 35  хувь доогуур зардаг нөхцөлөө сайжруулсан ханшаар гэрээлж чаддаг байх. Мөн өндөр ханшийн төлвийг мэдэрч ханшийг өндөр дээр түгжих санхүүгийн дериватив хэлцэлүүд хийх. Дунд, урт хугацаандаа баяжуулах үйлдвэр, боловсруулах үйлдвэрүүд зайлшгүй барих шаардлага байгааг анхаарах хэрэгтэй” гэжээ.

Тонн зэсийн үнэ 10 мянган ам.долларт хүрэх магадлалтай гэв

Зэсийн хамгийн том хэрэглэгч болох Хятад Улсад арилжааг эргэн нээснээс хойш үнэ нь долоо орчим хувиар нэмэгдсэнийг шинжээчид дурджээ. Түүнчлэн тус улс эрчим хүчний урт хугацааны төслүүдийг хэрэгжүүлж байгаа нь зэсийн түүхий эдийн далайцтай хэрэгцээ үүсгэж байгаа. Мөн “Блүүмбэрг” сэргээгдэх эрчим, цахилгаан автомашины үйлдвэрлэл нэмэгдэхтэй холбоотойгоор зэсийн эрэлт өсөх төлөв ажиглагдаж байгааг  дурдаж буй. Харин “Citigroup”-ийнхэн тонн зэсийн үнийг 10 мянган ам.долларт хүрэх магадлал өндөр байна гэх таамаглалаа удаа дараа илэрхийлээд байгаа. Мөн дэлхийн зэсийн зах зээлийн 30 хувийг дангаараа нийлүүлдэг Чили Улсад цар тахлын улмаас уул уурхайн үйл ажиллагаа доголдсон нь нийлүүлэлтийн хомсдол үүсгэж, эсрэгээрээ зэсийн ханш “цойлох” шалтгаан болж байгааг онцлох хэрэгтэй.