ЭМЯ-наас цаг үеийн нөхцөл байдалтай холбоотойгоор мэдээлэл хийж байна. Өнгөрсөн 24 цагийн хугацаанд ХӨСҮТ, ЗӨСҮТ, НЭМҮТ, НЭМГ, УНТЭ, Сэлэнгэ, Дорноговь, Дархан, Орхон аймгийн лабораториудад нийт 13269 хүнд ПСР шинжилгээ хийхэд 108 хүнээс коронавирусийн халдвар илэрсэн. Улмаар Монгол Улсад нийт халдвар авсан хүний тоо 3336 боллоо.

Мөн “ХӨСҮТ-д нэн хүнд оноштойгоор эмчлэгдэж байсан нэг хүн нас барсан. Тухайн хүн халдвар авснаасаа хойш 21 дэх хоногтоо эмчлүүлж байсан бөгөөд олон эрхтний дутагдал, бөөрний дутагдал, сахарын хүндрэлээр нас барлаа” хэмээн ХӨСҮТ-ийн Тандалт, судалгааны албаны дарга асан А.Амбасэлмаа мэдээллээ. Монгол Улсад нийт 732 хүн эмчлэгдэж байгаагаас хөнгөн 659, хүндэвтэр 68, хүнд гурав, нэн хүнд хоёр хүн эмчлэгдэж байгаа юм.