Цас бударсан шинэхэн өглөө. Бараг хүнгүй шахам үүрээр байнга л ажиллаж байдаг хүмүүс бол ТҮК-ийн ажилчид. Нийслэл Улаанбаатар хотыг хоггүй, халтиргаа гулгаагүй, өнгөтэй, өөдтэй байлгахын тулд тэд халуун сэтгэл, хүч хөдөлмөрөө зориулдаг.

Хөл хорионы үед эмч, цагдаа, цэрэг, онцгой байдлынхантай мөр зэрэгцэн ТҮК-ийнхэн ажиллаж байна. Өвлийн хүйтэн, зуны халууныг үл ажран үүрийн таван жингээс үдшийн бүрий хүртэл гараа цуцтал, нуруугаа бөхийтөл тэд ажилладаг. Цас, бороо орж, шуурсны дараа ТҮК-ийнхний ажил ундарч, зам, гудамж, талбай цэвэрлэх нь амаргүй болдог ч тэд ажирдаггүй. Харин бидэнд тэдний хөдөлмөрийг үнэлэх сэтгэл бий юү.