Дэлхий даяарх олон сая хүний мэдэх хүн аалз, ахмад америк, төмөр хүн, халк зэрэг дүрүүдийг бүтээсэн АНУ-ын зохиолч, зураач, продюсер Стэн Лий гурван жилийн өмнө 95 насандаа өөд болсон. Түүнийг өөд болсны дараа Марвелын үнэнч шүтэн бишрэгч нэгэн залуу түүнд хаягласан захидлаа гэр бүл, төрөл төрөгсөд рүү илгээжээ. Стэн Лийд ирсэн сүүлчийн захидлыг гэр бүл нь олон нийтэд цацсаны дараа өвөөгүй өссөн нэгэн Энэтхэг эрд Стэн Лий өвөө нь болсон гайхалтай түүх гаднын улсуудын уншигч, үзэгчдэд хүрсэн юм. Уг захидлыг ээлжит “Захидал” булангаараа уншигч та бүхэнд хөрвүүлэн хүргэж байна.

Стэн Лий өвөөдөө,

       Яагаад би таныг өвөө гэж хэлсэн бэ гэдэгт та гайхаж байж мэдэх юм. Та яагаад миний өвөө болох талаар өгүүлэх энэ захидлыг уншихад тийм ч их цаг орохгүй. Би бага ахуй наснаасаа л ээж, аав, эмээгийнхээ ярьдаг, дурсдаг түүхүүдэд дуртай байлаа. Харин ганцхан надад л бусад хүүхдүүдийнх шиг үлгэр ярьж өгөх өвөө байгаагүй юм. Гэсэн хэдий ч миний бага нас хэнээс ч дутахгүй адал явдалтай, гайхамшигтай сонирхолтой өнгөрсөн. Икс хүмүүс, ахмад америк, хүн аалз, гайхамшигт халк гээд л. Та тэр бүх супер баатруудыг “амилуулж” бүтээсэн нэгэн шүү дээ. Миний хувьд та өвөө минь байсан.

      Би таныг энэ бүх супер баатрууд, тэдний гайхалтай түүхүүдийг хэрхэн бүтээсэн талаар үргэлж боддог байлаа. Гэхдээ таныг нас барах хүртэл тань нэрийг чинь ч мэддэггүй байсан юм. Хэний ч тоож хардаггүй сонины цаасан дээрх таныг дурсаж, эмгэнэсэн нийтлэлийг хараад л “Одооноос хэн надад аз жаргал, гайхамшгийг харуулах юм бэ” гэж асуумаар санагдсан. Миний дотоод төсөөллийн ертөнц таны үхлээр дууссан. Хэдхэн жилийн өмнө эмээ минь намайг орхиод явсан, одоо та...

       Аав, ээж маань үргэлж надад хандан “Чи хүүхэлдэйн кино, комик, уран сайхны кино үзэхэд хэтэрхий том болжээ” гэдэг юм. Харин надад бол тийм биш. Таны бүтээсэн гайхалтай дүрүүдийг биширч, би ч өөр дотроо супер баатар болсон.  Таны бүтээсэн амьдралын түүхүүд, гайхамшигт адал явдлууд энэ харгис хэрцгий ертөнцөд амьдрах урам зориг өгсөөр байдаг. Та л надад өөрөө өөрийнхөө ертөнцийн зохиолч болох итгэл найдвар бэлэглэсэн. Гэсэн хэдий ч би тань шиг гайхалтай зохиолч болж чадахгүй.

       Хүүхдүүд үргэлж л өвөөдөө ямар нэгэн бяцхан гомдол тээж байдаг. Надад ч мөн танд гомдсон зүйл бий. Та “Хүн аалз” киноны үргэлжлэлийг хийхдээ жүжигчнийг нь сольсонд би одоо ч сэтгэл дундуур байдаг. Бас “Икс хүмүүс” киноны төгсгөлийн ангид Логаныг хөнөөхөд чинь дургүй хүрсэн. Сүүлийн “Өшөө авагчид”-ын кинон дээр ч хайртай дүрүүдийг маань хөнөөхөд би яг л жоохон хүүхэд шиг уйлж байлаа.

       Хүн аалз надад өөрийн олсон хүч чадал, үүргээ ухамсарлахыг сургасан. Халкаас бүрэн дүүрэн хийсэн зүйлс минь намайг илүү хүчирхэг болгодог болохыг ойлгосон. Та төмөр хүн, ахмад америкийн кинонуудад Марвелын дүр төрхийг харуулж, өөрийнхөө дүрийг мөнхөлж байжээ. Энэ дэлхийн бүх хүмүүс тань шиг бүхий л хүмүүсийг гэр бүлээ, эх орон нэгтэн гэж боддог байсан ч болоосой. Таны бүтээсэн супер баатрууд бүгд л нөмрөггүй. Хэрэв та намайг бага байхдаа нөмрөг өмсөөд гүйж байсныг харсан бол элгээ хөштөл инээх байсан даа.

        Та нэгэн удаа “Дэлхий дээрх хамгийн бодит супер баатрууд бол эрдэмтэн, эмч нар юм” гэж хэлж байлаа. Гэхдээ би үүнтэй ч санал нийлэхгүй. Тэд хэчнээн ч их ажил хийж, сайн үйлс үйлдсэн ч нэгэн л хэвийн уйтгартай байна. Тэд адал явдал гээчийг мэдэхгүй. Надад хэзээ ч урам зориг хайрлаж байгаагүй. Гэхдээ та надад урьд өмнө нь хэний ч өгөөгүй урам зоригийг өгсөн. Танаас л би зөвхөн өөрийгөө бус дэлхий дээрх бүхий л хүмүүсийн төлөө санаа зовних, өвдөх ухаанд суралцсан. Супер баатар байх ийм хэцүү байдаг гэж үү, өвөө...

        Гэвч та бүтээсэн ертөнцийнхөө төгсгөлийг бидэнд бүрэн харуулж чадалгүй хорвоог орхижээ. Хэн нэгэн таны дутууг нөхөж, гүйцээх л байх. Гэхдээ таны бодсон шиг болохгүй ч байж мэдэх юм. Марвелын киног үзэж, комик номыг унших болгондоо би таныг санах байх.

      Амьдралыг минь хүчирхэг төсөөллөөр дүүргэж, сайн хүн болоход тусалсанд маш их баярлалаа.

Хайрт хэний ч үл таних ичгүүргүй Энэтхэг нэгэн