Бид редакцаасаа томилолт авч, Дорноговь аймгийг зорилоо. Уншигч, үзэгч та бүхний хэзээний мэддэг болсон “Шинэ танил” булангаа бэлтгэхээр явж буй нь энэ юм. Тус аймаг бол соёлын биет болон биет бус өвийг өвлөн тээгч, түгээн дэлгэрүүлэгчдийн өлгий нутаг. Тэр дундаа үндэсний хөгжим, монгол бүжгээрээ алдартай юм. Биднийг Сайншанд сумын Ерөнхий боловсролын тавдугаар сургуулийн “Болор эгшиглэн” хамтлаг Хамарын хийдэд хүлээж байлаа. Энэ удаагийн дугаараар та бүхэндээ дорнын их говийн үндэсний хөгжмийн хамтлагийг танилцуулах болно.

Бид “Болор эгшиглэн” хамтлагийн багш Б.Баттайванаас цөөн асуултад хариулт авлаа.

-Сайн байна уу, манай уншигчдад өөрийгөө танилцуулаач?

-Юуны өмнө манай хамтлагийг зорьж ирсэн та бүхэнд баярлалаа. Намайг Батболдын Баттайван гэдэг. Дорноговь аймгийн Ерөнхий боловсролын тавдугаар сургуульд хөгжмийн багшаар ажилладаг. Манай эхнэрийг Гантулгын Сүрэн гэдэг бид хоёр нэг сургуульд, нэг мэргэжлээр ажилладаг.  Манай сургууль 10 жилийн түүхтэй шинэхэн сургууль. Өөрөөр хэлбэл, Би 2013 онд сургуулиа нээгдэхэд нь хөгжмийн багшаар ирж, “Болор эгшиглэн” хамтлагийг байгуулсан.  

-Хамтлаг хэдэн хөгжимчдийн бүрэлдэхүүнтэй вэ?

-Одоогоор хөгжим сурах чин эрмэлзэлтэй, хичээл зүтгэлтэй мөн авьяастай 21 сурагчийн бүрэлдэхүүнтэйгээр хөгжмийн сургалтаа явуулж байна. Эдгээр хүүхдүүд маань анхны байгуулсан хамтлагаас залгамжилсан дөрөв дэх үеийн хөгжимчид. Тэгэхээр 2013 оноос хойш дөрвөн хамтлаг буюу 70 гаруй хүүхэд “Болор эгшиглэн” хамтлагийн бүрэлдэхүүнд багтаж, хөгжмийн сургалтад хамрагдаад байна. Манай хамтлаг байгуулагдсан цагаасаа эхлэн улс болон олон улсын чанартай тэмцээнд уралдаанд амжилттай оролцож ирсэн.

-Та анх хамтлагаа байгуулахдаа яагаад “Болор эгшиглэн” гэдэг нэрийг сонгосон бэ?

-Эхнэр бид хоёр наймдугаар ангиа төгсөөд Дорноговь аймгийн МСҮТ-ийн Үндэсний хөгжмийн ангид элсэн орж байсан юм. Энэ мэргэжлээр байгуулагдсан анхны анги болохоор сургуульдаа яаран очиж байлаа. Биднийг ангидаа ороход Монгол Улсын соёлын тэргүүний ажилтан, Боловсролын тэргүүний ажилтан Намсрайн Батнасан гэдэг суутай хүн биднийг хүлээж авсан. Монгол Улсын соёлын тэргүүний ажилтан, Боловсролын тэргүүний ажилтан багшийг маань дорноговьчууд гэлтгүй хөгжмийн урлагийг мэддэг, судалдаг хүн бүр мэднэ. Учир нь өөрийн амьдралын бүхий л цаг хугацаа, зүрх сэтгэлээ аймгийн хүүхэд багачуудын авьяасыг нээн илрүүлэх, хөгжүүлэн дэлгэрүүлэх гэгээн үйлсэд зориулсан хүн учир багшийг маань танихгүй хүн ховор байх. Манай ангийн 13 оюутан хоорондоо ярилцаж, багштай зөвлөсний  эцэст үндэсний хөгжмийн хамтлаг байгуулж “Болор эгшиглэн” гэдэг нэр өгч байсан. Харамсалтай нь багш маань дэндүү эрт биднийгээ орхиод явчихсан. Тийм болохоор багшийнхаа эхлүүлсэн үйл хэргийг үргэлжлүүлэхийн тулд “Болор эгшиглэн” гэдэг хамтлаг байгуулсан.

-Танд болон “Болор эгшиглэн” хамтлагийнхаа авьяаслаг сурагчдад илүү олон амжилт гаргахыг ерөөе?

-Баярлалаа.

“БОЛОР ЭГШИГЛЭН” ХАМТЛАГ БОЛОН ГИШҮҮДИЙН АМЖИЛТЫН БУУХИА:

• 2013 онд “Ая эгшгийн зургаан жигүүр” өсвөрийн хөгжимчдийн улсын 9-р уралдааны тавдугаар байр (Болор эгшиглэн хамтлаг)
• 2013 онд Говьсүмбэр аймагт зохиогдсон “Хөгжмийн эгшиг” өсвөрийн хөгжимчдийн говийн бүсийн уралдааны ТЭРГҮҮН байр \Болор эгшиглэн хамтлаг\
• 2013 онд Говьсүмбэр аймагт зохиогдсон “Хөгжмийн эгшиг” өсвөрийн хөгжимчдийн говийн бүсийн уралдааны Гоцлол хөгжмийн төрөлд сурагч Б.Сувд-Эрдэнэ, З.Бат-Эрдэнэ нар АЛТАН медаль
• 2013 онд аймгийн хүүхдийн урлагийн “Яргуй” наадамд анх удаа оролцож нэг алт, зургаан мөнгөн медаль
• 2014 онд аймгийн хүүхдийн урлагийн “Яргуй” наадмын ТЭРГҮҮН байр, ШИЛДЭГ СУРГУУЛЬ өргөмжлөл
• 2015 онд Эрдэнэт хотод зохион байгуулагдсан “Уран эгшиг” өсвөрийн хөгжимчдийн улсын уралдаанд хамтлаг хөгжмийн төрөлд ДЭД байр, “ШИЛДЭГ СУРГУУЛЬ, АЙМАГ”-аар шалгарсан.
• 2015 онд Эрдэнэт хотод зохион байгуулагдсан “Уран эгшиг” өсвөрийн хөгжимчдийн улсын уралдаанд гоцлол хөгжмийн төрөлд сурагч Ба.Сувд-Эрдэнэ АЛТАН медаль
• 2017 онд Эрдэнэт хотод зохион байгуулагдсан “Уран эгшиг” өсвөрийн хөгжимчдийн улсын уралдаанд гоцлол хөгжмийн төрөлд сурагч Б.Сувд-Эрдэнэ МӨНГӨН медаль, сурагч Б.Буянзаяа ХҮРЭЛ медаль
• 2017 онд Эрдэнэт хотод зохион байгуулагдсан “Уран эгшиг” өсвөрийн хөгжимчдийн улсын уралдаанд хамтлаг хөгжмийн төрөлд тусгай байр, шүүгчийн нэрэмжит шагнал
• 2018 онд”Ая эгшгийн зургаан жигүүр” өсвөрийн хөгжимчдийн улсын уралдааны хамтлаг хөгжмийн төрөлд хүрэл медаль. Гоцлол хөгжим, 12А ангийн сурагч Г.Маралмаа мөнгөн медаль
• 2018 онд “Ёочин, ёочин төст хөгжимчдийн олон улсын анхдугаар уралдаан, 12Б ангийн сурагч Бат.Сувд-Эрдэнэ хүрэл медаль
• 2018 онд Говьсүмбэр аймагт зохион байгуулагдсан “Хөгжмийн эгшиг” зүүн бүсийн өсвөрийн хөгжимчдийн уралдааны “Шилдэг хамтлаг”. 2018 онд “Шинэ үе” сургуулийн нэрэмжит өсвөрийн хөгжимчдийн улсын анхдугаар уралдаан, “Болор эгшиглэн” хамтлаг Тэргүүн байр
• 2018 онд “Алтан цом-2018” хүүхдийн урлагийн их наадам “Болор эгшиглэн” хамтлаг тэргүүн байр тус тус эзэлсэн.
•  2019 онд Дархан-Уул аймагт зохиогдсон Ёочин хөгжимчдийн улсын анхдугаар уралдаанд дунд насны ангилал Э.Энхжин Тусгай байр, ахлах нас Бат.Сувд-Эрдэнэ ГРАНПРИ
•  2019 онд Дорноговь аймгийн нэрт морин хуурч Чой. Банзрагч агсаны нэрэмжит аймгийн морин хуурчдын анхдугаар уралдаанд сурагч Нандин-Очир Тусгай байр, О.Баярсүрэн Гутгаар байр, Н.Энхбаясгалан Тэргүүн байр, Г.Алтангэрэл ГРАНПРИ
• 2019 онд Найрал дууны “Болор-Одод” олон улсын уралдаанд 15 сурагч шагналт 8-р байр 2022 онд Яргуй хүүхдийн урлагийн их наадам Гоцлол хөгжим дунд нас Г.Учрал Мөнгөн медаль, Түвшинбаяр Алтан медаль, ахлах нас Х.Энхжин мөнгөн медаль, О.Баярсүрэн алтан медаль " Болор-Эгшиглэн хамтлаг тэргүүн байр