-ХӨЛӨӨ ГЭМТЭЭЧИХЭЭД ХЭВТЭЖ БАЙХАД АНГИЙНХАН МААНЬ ЭРГЭЖ, НАДАД МАШ ГОЁ ҮГТЭЙ ЗАХИА, БЭЛЭГ АВЧИРЧ ӨГСӨНД БАЯРЛАДАГ-

  Хөл нь өвдөж, хүнд бэртсэн охиныг ангийнх нь хөвгүүд эргэж очиж байгаа зураг цахим орчинд тархаж, олон хүний хайр, хүндэтгэлийг хүлээгээд байна. Тэгвэл тус зурагны эзэд Дорнод аймгийн Баян-Уул сумын ерөнхий боловсролын сургуулийн тавдугаар ангийн сурагчид байжээ. Хүүхдүүд хөлөө хугалсан ангийнхаа охиныг эргэж, охины аав зургийг цахим орчинд тавьсан байна. Бид хамгийн тунгалаг харц, дулаахан инээмсгэлэл, хөөрхөн зургийн эзэн болох сурагч Б.Агь-Үжинтэй ярилцлаа. Тэрбээр хоёр жилийн өмнө хөлөө гэмтээсэн ч өдгөө эдгэж, эрүүл саруул ангийнхаа найзуудтай хөтөлцөөд гүйж яваа билээ.

-Сайн уу, хичээлдээ онц сурч байна уу. Чиний зургийг цахимаас хараад холбогдож байна. Тэр зургийн тухай ярьж болох уу?

               -Сайн, сайн байна уу, та. Бидний хичээл, ном сайн. Ангийнхантайгаа хичээлдээ яваад ёстой гоё байна. Миний хөл өвдсөн цагаас хойш бараг манай хичээл ороогүй юм. Харин энэ жил бид долдугаар ангид орж, хичээлдээ тасралтгүй явж байгаадаа баяртай байгаа. Хоёр жилийн өмнө буюу тавдугаар ангид байхдаа би хөлөн дээр дугуй унагааж, хугалсан. Сар гаруй хугацаанд эмнэлэгт хэвтэж, гэртээ гарч ирээд байхад ангийнхан маань эргэж ирсэн юм. Тэр зургийг манай аав дарж өгсөн. Одоо ингээд найзуудын минь зураг цахим орчинд тархаж, хүмүүс биднийг магтаж, “Зөв хүүхдүүд, хайр хүргэж байна. Ямар мундаг хүүхдүүд вэ” зэрэг гоё үгсийг илгээж байгаад бүүр ч баяртай байна.

Б.АГЬ-ҮЖИН ОХИНЫ АНГИЙНХАН. ДОРНОД АЙМАГ БАЯН-УУЛ СУМ

-Дандаа хөвгүүд нь эргэж ирсэн юм уу?

           -Манай анги 22 хөвгүүн, 11 охинтой. Тэр өдөр цэргийн баяр байсан юм аа. Охид хөвгүүдээ баярлуулж, ангиа цэвэрлээд үлдсэн юм билээ. Тэгээд манай ангийн найман хөвгүүн намайг эргэж ирсэн. Хэдийгээр багш, охидууд ирээгүй ч надад маш гоё үгтэй захиа бичээд, бүгдээрээ нэрээ бичээд явуулсан байсан. Би захиаг нь уншаад уйлсан. Найзуудтайгаа хамт гарч, бушуухан шиг л гүйхийг хүсэж байлаа. Хөвгүүдтэйгээ цуг анги руугаа гүйчихмээр л санагдаад байсан шүү.

Хэдийгээр багш, охидууд ирээгүй ч надад маш гоё үгтэй захиа бичээд, бүгдээрээ нэрээ бичээд явуулсан байсан

-Юу гэсэн захиа байсныг одоо санаж байна уу?

         -Намайг мундаг учраас хурдан эдгэрнэ гэж бичсэн байсан. Тэгээд “Хурдан эдгээрэй, ангийнхандаа гүйгээд ирээрэй. Хүлээж байгаа шүү. Санаж байна, бас хайртай шүү. Зоригтой байгаарай” гэж бичсэн байсан. Ангийн маань хөвгүүд надад захианаас гадна бэлэг авчирч өгсөн. Бүгдээрээ намайг эргэж ирж байгаадаа баярлаад, бид бөөн баяр болоод уулзцгаасан.

-Бэлэгнийхээ уутыг урчихсан байсан. Замдаа ноцолдсон гэнэ үү, хөвгүүд нь?

             -Үгүй ээ, тэд нар манайх руу ирж явж байгаад нохойд хөөгдсөн юм билээ. Гэрт орж ирэхдээ гүйлдээд, “Нохойд хөөгдөөд уутаа урчихлаа” гэж хэлсэн. Манай энэ хавьд хаздаг нохой ихтэй болохоор тэр хэд нохойд хөөгдөж, уутаа урсан нь үнэн байх аа.

-Танай ангийнхан өвдсөн хүүхдүүдээ байнга эргэдэг үү?

          -Тийм ээ, бидэнд заримдаа мөнгө байдаггүй юм. Ангийнхаа хүүхдэд авиачиж өгөх бэлгийг ангийн багш маань бид нар авч өгдөг байсан, заримдаа. Тэгээд бид нарыг сэтгэлийн үгтэй захиа бичээд, найздаа хүргэж өгөөрэй гэдэг байсан юм. Одоо бид дунд ангид орсон ч ангийнхаа хүүхдэд санаа тавих, өвдөж, шаналсан нэгнийгээ эргэх, сэтгэлийн дэм өгөхөө үргэлжлүүлсээр л байгаа. Амь нэгтэй болсон гэх юм уу даа.

-Багшийнхаа тухай яриад өгөөч?

          -Манай бага ангийн багшийг Буянжаргал гэдэг байсан. Харин дунд ангийн маань багш шилжиж, манай ангийг Уянга багшиж, удирдаж аваад удаагүй байгаа. Буянаа багшаас бид нэгийгээ хайрлах, нэгэндээ урам өгөхийг сурч авсан. Багш маань бидэнд “Нэгэндээ дэмтэй яваарай. Муу хүүхэд гэж байхгүй шүү. Миний хүүхдүүд мундаг учраас нэгийгээ байнга хайрлаж, эвтэй найртай байгаарай” гэж захисан. Тийм ч учраас манай ангийхан эвтэй, үргэлж нэгийгээ хайрладаг.

-Ангийнхандаа хандаж юу гэж хэлмээр байна вэ?

-Багшдаа, ангийхандаа хайртай шүү. Бид одоо долдугаар ангийн сурагчид учраас хичээлээ сайн хийж, хүссэн мэргэжлээрээ суралцана. Бид сайн хичээх болно. Ангийнхандаа амжилт хүсмээр байна.

-Чи ямар мэргэжилтэй болохыг хүсдэг вэ?

-Эмч болохыг хүсдэг. Гадаадад суралцаж, чадварлаг эмч болно оо. Хайртай гэр бүлээ эмчилж, урт удаан хамт байхыг хүсдэг. Дээрээс нь, манай ангийн нэг охины бие дандаа өвддөг юм. Тэр найзыгаа эмчлэхийг хүсэж байна. Миний мөрөөдөл удахгүй биелэх болно.

Дээрээс нь, манай ангийн нэг охины бие дандаа өвддөг юм. Тэр найзыгаа эмчлэхийг хүсэж байна.