Тавантолгой-Гашуунсухайт чиглэлийн төмөр зам нь Өмнөговь аймгийн Цогтцэций, Баян-Овоо, Ханбогд сумын нутаг дэвсгэрээр 240 км үргэлжлэх бөгөөд I зэрэглэлийн “UIC-60” стандартын, уулзваргүй төмөр зам юм. Мөн нийт уртад 16 гүүр, үер усны 126  хоолой, мал амьтны найман гарцыг шийдсэн байдаг. Төслийн захиалагчаар “Тавантолгой төмөр зам” ХХК, ерөнхий гүйцэтгэгчээр “Бодь Интернэшнл” ХХК ажиллаж байгаа бол төсөлд нийтдээ 383 инженер, техникийн ажилтан, 1368 орчим гүйцэтгэлийн ажилтан, 771 гаруй машин техниктэйгээр ажиллаж байна.

Уг төслийн хэмжээнд хоёр өртөө, зургаан зөрлөгт нийт 77 ширхэг суман шилжүүлэг угсрагдах аж. Суман шилжүүлэг гэдэг нь галт тэргийг нэг замаас нөгөө зам руу шилжүүлэх зориулалттай байгууламж юм. Тэгвэл энэ сарын 24-нд хамгийн анхны суман шилжүүлгийг амжилттай угсарчээ. Тодруулбал, “Зөрлөг 2” буюу төмөр замын 65 дахь км-т анхны суман шилжүүлгийг усгарсан нь энэ юм.