-2018 онд улсын хэмжээнд 324 булаг, шанд ширгэжээ-

Монгол орны цөлжилтийн талаар БОАЖЯ-ны Газар зүй геологийн хүрээлэнгийн мэргэжилтэн А.Цээпилээс тодрууллаа.

-Монгол орны хэдэн хувь нь цөлжилттэй байна вэ?

-Манай улс цөлжилтийн судалгааг таван жилийн давтамжтай хийдэг. Өнгөрсөн онд манай орны 78.9 хувийн цөлжилттэй байна гэсэн судалгаа гарсанр. Цөлжилт цаашид нэмэгдэх хандлагатай байгаа. Энэ нь зөвхөн Монгол Улсаас шалтгаалсан асуудал биш.

Дэлхий нийтийн уур амьсгалын өөрчлөлт бий болж байгаа шүү дээ. Байгаль орчин, аялал жуулчлалын яамнаас 2016 оноос Архангай, Дорнод, Сүхбаатар зэрэг аймгийн булаг шандны эх тохижуулж, хашиж хамгаалсан. Үүнээс гадна Завхан аймагт 25 га,  Говь-Алтай аймагт 20 га-д  элсний нүүдэл хамгаалах механик хамгаалалт хийлээ. Мөн Говьсүмбэр аймагт таван га-д хамгаалалтын зурвас байгуулж, мод тарьсан. Ховд, Говь-Алтай, Баянхонгор, Өмнөговь, Дундговь, Говьсүмбэр гэсэн зургаан аймагт мод тарихаар шийдвэрлээд байгаа. Эдгээр аймагт ойн зурвас байгууллахаар шийдсэн. Тус аймгуудад арга хэмжээг хэрэгжүүлснээр 190 орчим га талбайд хамгаалалтын зурвас байгууллан ажиллаж байгаа.

-Одоогийн байдлаар ямар нэртэй булаг, шанд хашиж хамгаалсан бэ?

-2018 онд улсын хэмжээнд 324 булаг шанд ширгэсэн байна. 236 булаг шандыг тохижуулж, хашиж хамгаалсан.

Харин өнгөрсөн онд цөлжилтийг бууруулах арга хэмжээний хүрээнд Сүхбаатар аймгийн Баяндэлгэр сумын Бортолгой булаг, Уулбаян сумын Зүүн булаг, Дорнод аймгийн Чойбалсан сумын Баянбулаг, Архангай аймгийн Их-Тамир сумын Улаантолгой рашаан, Завхан аймгийн Цэцэн-Уул сумын Дэлгэрэхийн рашааныг тохижуулан хашиж хамгаалсан.

Цөлжилт, газрын доройтлыг үнэлэхдээ урт хугацааны цуваан дахь аномалийн утгын давтамжаар нэн хүчтэй, хүчтэй, дунд, сул, илрээгүй гэсэн зэрэглэлээр ангилдаг.

-Манай орны  78.9 хувийн цөлжилттэй юм байна. Аль аймагт цөлжилт хамгийн их байна вэ?

-Хээр, хээрээс урагш говийн аймгуудаар цөлжилт ихтэй байсан. Хамгийн сүүлийн үеийн судалгаагаар төвийн аймгуудаар цөлжилт илэрсэн. Малын бэлчээрийн асуудал үүнтэй холбоотой.

-Газрын доройтол, цөлжилт хоёр юугаараа ялгаатай вэ?

-Хээрийн бүсээс урагш цөлжилт гэж ярьдаг. Харин хангайн бүсэд газрын доройтол гэж нэрлэдэг.

-Газрын доройтлыг хэрхэн үнэлдэг вэ?

-Газрын доройтлыг нэн хүчтэй, хүчтэй, дунд, сул, газрын доройтол илрээгүй гэх таван ангилалд хуваан үнэлдэг.