-Гэнэт хүйтэрч, дараа нь огцом дулаарч байгаа нь агаар мандлын орчил урсгалтай холбоотой-

       Цаг агаарын төлөв байдал болон зудын эрсдэлийн үнэлгээний талаар ЦУОШГ-ын Орчил урсгал, урт хугацааны прогноз судалгааны хэлтсийн инженер Ш.Тэргэлээс тодрууллаа.

-Нэгдүгээр сарыг дуустал цаг агаарын нөхцөл байдал ямар байх төлөвтэй байна вэ?

       -Нэгдүгээр сарын төлөв байдлын хувьд Монгол орны нутгийн зүүн хойд хэсгээр олон жилийн дунджаас хүйтэн байх бол бусад нутгаар олон жилийн дундаж орчим байх төлөвтэй байгаа. Хур тунадасны хувьд төвийн бүсийн хойд хэсгийн Булган, Сэлэнгэ, Төв аймаг, Хэнтий аймгийн урд, баруун хэсгээр, Дорнод, Сүхбаатарын өмнөд, Дорноговь аймгийн зүүн хэсгээр олон жилийн дунджаас их байх төлөвтэй. Говь-Алтай, Баянхонгор, Өвөрхангай аймгийн урд болон Өмнөговь аймгийн ихэнх нутгаар олон жилийн дунджаас бага хур тунадас орох төлөвтэй байгаа. Бусад нутгаар олон жилийн дундаж орчим байна.

-Энэ жилийн хувьд өнгөрсөн оны дунджаас хүйтэн байх төлөвтэй байна уу?

       -Нэгдүгээр сарын эхний 10 хоногийн төлөвөөр агаарын температур олон жилийн дунджаасаа хүйтэн байсан ч өнгөрсөн оны мөн үетэй харьцуулахад харьцангуй дулаан байсан.

-Сүүлийн үеүүдэд огцом хүйтэрч, дулаарч байна. Саяхан Ховд аймагт ГУРВАН ХЭМИЙН дулаан байсан талаар мэдээлсэн. Агаарын температур тогтворгүй байгаа нь юутай холбоотой вэ?

       -Өнгөрөгч оны арваннэгдүгээр сарын эхний хоёр 10 хоногийн байдал нь олон жилийн дунджаас харьцангуй дулаан байсан. Харин хоёрдугаар 10 хоногийн сүүлд агаарын температур харьцангуй сэрүүсэж, өмнөх үеэсээ илүү хүйтэрсэн. Ингэж хүйтнээ хадгалсаар арванхоёрдугаар сард олон жилийн дунджаас илүү хүйтэн байлаа. Улмаар уг хүйтний эрч хадгалагдаж, энэ сар хүйтрэх төлөвтэй байна. Гэнэт хүйтэрч, дараа нь огцом дулаарч байгаа нь агаар мандлын орчил урсгалтай холбоотой. Харин зарим нутгуудад агаарын температур дулаан байгаа нь газар нутгийн онцлогтой холбоотой байж болно.

-Энэ сард хүйтний эрч үргэлжлэх юм байна. Урьдчилсан төлөв байдлаар энэ сард хамгийн дээд талдаа  хэдэн хэм хүрч, хүйтрэхээр байна вэ?

       -Яг хэд хүрнэ гэж тооцож, тогтоосон зүйл байхгүй. Явцын хувьд хоёрдугаар 10 хоногт буюу энэ сарын 23, 24-ний өдрүүдээс сарын сүүл үе хүртэл цаг агаар төлөв байдал муудаж, хур тунадас орно.

-Зудын эрсдэлийн үнэлгээ гарсан. Аль аймаг, сумдаар бусад аймгаас илүү зудын эрсдэлтэй байгаа вэ?

       -Манай хүрээлэнгийн хөдөө аж ахуйн судалгааны хэлтсээс зудын эрсдэлийн үнэлгээ гаргадаг. Тухайн зурган үнэлгээг энэ өвөлд гурван удаа гаргасан. Эхнийх нь арванхоёрдугаар сарын 2-нд, хоёр дахь нь өнгөрсөн сарын 12-нд, сүүлийнх нь энэ сарын 10-нд тус тус гарсан байгаа. Зудын эрсдэлийн зургаас үзвэл, төвийн бүсийн Баянхонгор, Өвөрхангай, Дундговь, Өмнөговь аймгуудын ихэнх нутгаар зудын эрсдэлтэй. Нутгийн хойд хэсэг Хөвсгөл, Булган, Сэлэнгэ, Хэнтий, Дорнод аймгийн ихэнх сумдаар дунд зэргийн зудын эрсдэлтэй гэсэн судалгаа байгаа. Дээр дурдсанаас бусад нутгаар эрсдэл их байх төлөвтэй байна.

-Уг судалгааг хэрхэн гаргадаг вэ?

      -Судалгааг зуны хур тунадас болон цасны байдал зэргээс үндэслэж, гаргадаг.

-Цаг уурын нөхцөл байдал, зудын эрсдэлийн үнэлгээнээс хамаарч малчдад ямар зөвлөгөө өгөх вэ?

      -Зудын эрсдэлтэй аймгуудын малчид өвөлжилтийн бэлтгэлээ сайн хангасан байгаа болов уу. Харин сарын урьдчилсан төлөвийн дагуу өвөлжилт хүндрэхээр байгаа газруудын иргэд өвөлжилтийн бэлтгэлээ сайтар хангах нь зүйтэй. Улирлын ерөнхий төлөвөөр ирэх хоёр, гуравдугаар сарын хувьд агаарын температур олон жилийн дундаж орчим байгаа. Харин дөрөвдүгээр сард агаарын температур олон жилийн дунджаасаа дулаан байх төлөвтэй байна.