Талын монгол нутагт минь тэнүүн сайхан намар цаг ирлээ. Ургац хураалтын ажил ч идэвхтэй өрнөж, сайхан мэдээтэй үргэлжилж байгаа нь хэд хэдэн нэр төрлийн бүтээгдэхүүний хэрэгцээг дотоодоос бүрэн хангах боломж бүрдэж байгаа бөгөөд монголчууд сүүлийн 10 жил гаруй хугацаанд хураагаагүй их ургац хурааж, өвлийг өнөтэй давж, урин хавартай золгох нь ээ.

-СҮҮЛИЙН 10 ЖИЛД ХУРААГААГҮЙ ИХ УРГАЦ НӨӨЦӨЛЖ, УЛААНБУУДАЙ, ТӨМСНИЙ ХЭРЭГЦЭЭГ ДОТООДООС БҮРЭН ХАНГАХ БОЛОМЖТОЙ БОЛЛОО-

Засгийн газрын ээлжит хуралдаанаас гарсан шийдвэрийн танилцуулах үеэр ХХААХҮ-ийн сайд Х.Болорчулуун ургацын урьдчилсан баланс өндөр дүнтэй гарч, монголчууд сүүлийн 10 жилд хураагаагүй их ургац хураах талаар мэдэгдсэн. Тодруулбал, урьдчилсан балансаар энэ намар 480 мянган тонн улаанбуудай, 165 мянган тонн төмс, 165.8 мянган тонн хүнсний ногоо, 64.8 мянган тонн тосны ургамал, 225.6 мянган тонн малын тэжээлийн ургамал, 5000 тонн жимс жимсгэнэ хураан авах тооцоо гарчээ. Зөвхөн улаанбуудайгаас гэхэд 15 центр ургац авахаар байгаа бөгөөд бид улаанбуудай, төмсний хэрэгцээг 100 хувь, хүнсний ногооны 80 гаруй хувийг буюу дийлэнх хэмжээг дотоодоосоо хангах боломж бүрдээд байна. Түүнчлэн үр тарихаас ургац хураах хүртэлх хугацаанд улаанбуудайн үр технологийн шинэчлэл хийсний дүнд нэгжийн ургац өнгөрсөн жилтэй харьцуулахад 3.9 центр/га-гаар буюу 30 гаруй хувиар өсөж, чанарын дэвшил гарчээ. Ингэснээр нэгж ургацын үзүүлэлтээр сүүлийн 10 жилийн хамгийн өндөр түвшинд хүрээд байгаа юм байна.

Өнгөрсөн өвөл нийт нутгийн 80 гаруй хувь цастай, олонх аймагт өвөлжилт хүндэрч байлаа. Хоёрдугаар сар дуусах дөхөж байхад ч нийт нутгийн 60 гаруй хувь нь цастай байсныг учир мэдэх тариаланч, малчид сэрэмжлүүлж, зудтай, ургац багатай жил ирж мэдэхийг анхааруулж байв. Түүнчлэн есдүгээр сар гарснаас хойш их хэмжээний усархаг бороо орж байгаатай холбогдуулан ургац хураах ажлыг ч тодорхой хугацаанд хойшлуулаад байна. Зарим эх сурвалж ч сүүлийн 10 жилд хураагаагүй их ургацаа хураахаасаа өмнө цасанд даруулах эрсдэл ч тулаад байгааг хэлж байгаа юм. Тэгвэл холбогдох албанаас өгсөн мэдээллээр ургац хураалтын ажил идэвхтэй үргэлжилж байгаа бөгөөд их хэмжээний цас орж, ургац, талбай цасанд дарагдахаас өмнө монголчууд ургацаа хурааж дуусах цаг хугацааны хувьд эерэг нөхцөл байдал ажиглагдаж байгаа гэнэ.

Үр тариалахаас эхлээд ургац хураах хүртэлх энэ хугацаанд монгол тариаланчид шинийг туршиж, эх орондоо нэвтрүүлж, монгол хөрсөнд шинэ ногоо тариалж, өдгөө түүнийхээ анхны ургацыг хураан авахаар хүлээж байгаа олон талбай байна. Тухайлбал, Сэлэнгэ аймаг дахь "Монгол бяслаг, Шигүдэри" орон нутгийн 40 гаруй иргэнийг ажлын байраар хангаж үр тариалан өдгөө ургацаа хурааж байгаа бөгөөд бяслагийн дотоодын хэрэгцээний 20 гаруй хувийг дангаараа бүрдүүлэх боломжтой байгаа аж. Монгол тариаланчдын хөлс, хөдөлмөрөө шингээсэн ажлын үр дүн гарч, талын монгол нутагт тэнүүн сайхан намар ирлээ. Тариан талбай дуутай, тариаланчид баяртай өндөр ургацын намар болж байна даа.