Төрийн ордны нэгэн ажилтнаас коронавирусийн сэжигтэй тохиолдол илэрч, ордонд хөл хорио тогтоосон талаар бид мэдээлсэн. Тодруулбал, өнөөдөр 15:00 цагийн орчимд сэжигтэй тохиолдол илэрч, түргэвчилсэн оношлуураар шинжилгээ авахад хариу нь эерэг гарсан. Тухайн иргэнээс PCR шинжилгээ авсан бөгөөд хариу нь гурван цагийн дараа гарна гэж мэдээлж байсан юм. Тэгвэл ХӨСҮТ-ийн дарга Д.Нямхүү “Төрийн ордны ажилтны PCR шинжилгээний хариу сөрөг гарсан” гэж мэдээллээ. Ингэснээр төрийн ордонд тогтоогоод байсан хөл хориог цуцалж байна. Түүнчлэн эх сурвалжийн мэдээлж буйгаар тухайн ажилтан нь төрийн ордны сантехникч байжээ.