“Ковид-19” вирусийн халдвар дэгдсэнтэй холбогдуулан УОК-ын шийдвэрийн дагуу орон даяар Бүх нийтийн бэлэн байдлын зэрэгт шилжиж, хатуу хөл хорионы дэглэм тогтоогоод буй. Үүнтэй зэрэгцэн бүх шатны сургууль, цэцэрлэгийн үйл ажиллагааг зогсоосон бөгөөд их, дээд сургуулийн оюутнууд хичээлээ онлайнаар үзэж, ерөнхий боловсролын сургуулийн сурагчид теле хичээлд хамрагдаж байгаа. “Эргэлт.мн” сайт энэ удаад хөл хорионы үед сурагчид өөрийгөө хэрхэн хөгжүүлж байгаа талаар сурвалжилга бэлдсэн юм.

Ө.ЭЛБЭГДОРЖ

/Нийслэлийн 21 дүгээр сургуулийн 10а ангийн сурагч/

       Хөл хорионы энэ цаг хугацааг ашиглан Монголын оюун ухааны академийг төгсөж, сертификат авлаа. Мөн өөрийн онлайн хэрэглээг ашиглаад, хэлний боловсролоо дээшлүүлэхээр зорьж байна. Тэр дундаа солонгос хэл түлхүү сонирхож, бие даан сурч байгаа юм. Харин ашиглахаа больсон хуучин дэвтрийн хавтас, цаас зэргийг ашиглан тоглоом хийж үзлээ. Ингэж цаасны хаягдлаараа байгалиа бохирдуулахгүйгээр сонирхлоороо тоглоом хийж эхэлсэндээ их баяртай байгаа. Гэвч зөвхөн дур сонирхол гээд хичээлээ мартаж болохгүй. Нийслэлийн сургуулийн сурагчдад хэвийн байж болох ч хөдөө, орон нутагт байгаа сурагчид телевиз, гар утасны хүрэлцээгүй байдлаас үүдэн хичээлээ хийж чадахгүй нөхцөлд байдалд хүрч байна. Ялангуяа ахлах ангид 10 гаруй хичээл ордог тул түүнийг цаг тухайд нь хийж, багшдаа шалгуулах хүндрэлтэй байгаа тухай орон нутагт амьдардаг найзууд маань хэлж байгаа.

Б.ДУЛАМСҮРЭН

/ Эрдэнэт хотын 14 дүгээр сургуулийн 10д ангийн сурагч/

       Яагаад ч юм хөл хорионы үеийн амьдрал их сонирхолтой өвөрмөц, өмнө нь хэзээ ч авч байгаагүй бас авч үзээгүй мэдрэмжүүдийг өдрөөс өдөрт мэдрүүлсээр байна. Өмнө нь гэрийнхэндээ цаг гаргадаггүй байсан гэдгээ энэ үеэр л анзаарч харлаа. Шинэ хоолны жор, хоол хийх азгүй туршилтууд, уншиж амжихгүй байсан номнууд одоо бүгдээрээ л таалагдаж байна. Хөл хориог даван туулж чадна гэдэгт итгэлтэй байгаа. Хөл хорионы энэ үеийг бусад сурагчид ч боломж хэмээн хараасай, одоогийн түвшнээсээ нэг шат ч болов ахиасай гэж хүсэж байна.

О.ГАНТУЛГА

/Орхон аймгийн Эрдэнэт хотын 14 дүгээр сургуулийн 10б ангийн сурагч/

       Өмнө нь хичээлдээ анхаарлаа ихээр хандуулдаг байсан учир чөлөөт цаг бараг л гардаггүй байсан гэж болно. Харин хөл хорио тогтоосноор гэрийн нөхцөлд ашиглах боломжтой, чөлөөт цаг ч их гарч, өөрийгөө болон сонирхлоо хөгжүүлэх боломж гарч ирлээ. Ихэвчлэн гэрийн нөхцөлд тохируулан бие бялдраа хөгжүүлж байна. Үүний зэрэгцээ хар зураг зурж сурч, бийрэн бичлэгийн чадвараа сайжруулахад анхаараад байгаа минь надад ч зугаатай байна. Хэрэв боломжтой бол сургуулиа төгссөний дараа Япон Улсыг зорьж, сурах хүсэлтэй байгаа. Харин хэлний мэдлэгээ сайжруулах боломжийг хөл хорио гаргаж, өгч байна гэхэд хилсдэхгүй. Үе тэнгийнхэндээ хандаж хэлэхэд, “Хөл хорионы энэ их зав, чөлөөтэй цаг хугацааг үр бүтээлтэй өнгөрөөгөөрэй” хэмээн хүсэж байна.

Г.ОДГЭРЭЛ

/Завхан аймгийн Их-Уул сумын ерөнхий боловсролын сургуулийн 9г ангийн сурагч/

       Хөл хорионы үеийг ашиглан гэрийн нөхцөлд дасгал хийж, эрүүл мэндээ дэмжиж, бие бялдраа хөгжүүлж байгаа. Үүний зэрэгцээ теле хичээлээ үзэж, цаг заваар нь дүүгээ харах ажилтай. Энэ чөлөөт цагаа ашиглан, англи хэлний 1000 үг цээжлэх зорилт тавьсан. Өмнө нь хөл хорио тогтоогоогүй байх үед хичээлийнхээ хажуугаар давтлага, дугуйлан, сагсны тэмцээндээ оролцох ч зав гардаггүй байлаа. Карентины энэ үед үндэсний бичгээрээ төвөггүй сайн уншиж сурсандаа баяртай байна. Үлдсэн цагаа аль болох зөв, боловсон өнгөрөөж, гэр бүлдээ илүү их цаг гаргахыг хичээж байна даа.