Монголчуудын өргөн дэлгэр тэмдэглэдэг сар шинийн баяр хаяанд иржээ. Уламжлалт баяртай холбоотойгоор тавгийн идээ, гар цайлгах бэлэг, өмсөж, зүүх гоёл гээд бэлдэх зүйл цөөнгүй бий. Тэр дундаа шинэ сараа өнгөтэй байлгахыг бэлгэдэж шинэ дээл хувцас өмсдөг. Тэгвэл бид энэ жилийн дээл, гоёлын хувцасны үнэ, загвар ямар байгаа талаар сурвалжиллаа.

         Энэ жил дөрвөн арвайт хээтэй дээл мода болжээ. Мөн гүн цэнхэр, тод ногоон болон ягаан, хар өнгийн торгон дээлний  борлуулалт сайн байгаа аж. Дөрвөн арвайт хээтэй дээлийн үнэ 1.5 саяас эхэлнэ. “ Дөрвөн арвайт хээтэй эмэгтэй дээл 1.5-2.5 сая төгрөгийн үнэтэй байгаа. Харин эрэгтэй дээл 1.5-3.5 сая төгрөгөөр борлуулагдаж байна. Хос дээл 4-5 сая төгрөг гэж байгаа. Цагаан сарын дээлний захиалга дүүрсэн. Одоо тун цөөхөн захиалга нэмж авна” хэмээн Дөрвөн арвайт брэндийн борлуулалтын ажилтан хэлсэн юм. Мөн тус брэндийн малгай 700 мянга төгрөг бол гутал 400 мянган төгрөг аж.

         Харин Нарантуул худалдааны төвийн үндэсний хувцасны эгнээнд эмэгтэй дээлний үнэ 180 мянган төгрөгөөс эхэлж байлаа. Ингээд загвар болон эмжээр, материалаас хамаараад үнэ нь 650 мянга хүртэл өсөж байв. Эрэгтэй дээлний хамгийн доод үнэ 220 мянган төгрөг  бөгөөд иргэд ихэвчлэн тааран, даавуун материалтай бор, гүн цэнхэр өнгийн дээл худалдаж авч байгаа талаар худалдагчид хэлсэн юм. Тус эгнээний хамгийн үнэтэй эрэгтэй дээл нь  780 мянган төгрөг байлаа.  Бага насны хүүхдүүдэд буюу 0-12 насны хүүхдэд таарах загварын дээлүүд 60-90 мянган төгрөгөөр борлуулагдана. Хүүхдийн дээлний борлуулагч Д.Алимаа “Цагаан сар болох арай болоогүй учраас тэр юм болов уу иргэдийн худалдан авалт бага байна. Одоогоор дээл авахаас илүү үнийг нь асуусан хүн олон байна. Хүүхдүүдийн загварын дээл хэмжээнээсээ хамаараад 60-90 мянган төгрөг гэж байгаа” гэв.

         Луу жилийн дээлний голлох загвар нь тод өнгийн нарийн эмжээр гэнэ. Дээлний үндсэн өнгөнөөс өөр тод өнгөтэй, цаатай эмжээртэй загварын борлуулалт өндөр байгаа талаар худалдаачид ярьсан юм.

“БОРГОЛЖИН”, “IVEEL” БРЭНДИЙН ДЭЭЛНИЙ ҮНЭ 125 МЯНГАН ТӨГРӨГӨӨС ЭХЭЛЖ БАЙНА

Охид, бүсгүйчүүдийн сонгож үйлчлүүлдэг үндэсний үйлдвэрлэгч “Борголжин”, “Iveel” брэндийн загварын дээлний үнийн сонирхлоо.

       Борголжин брэндийн дан дээлний үнэ 130 мянган төгрөгөөс эхэлсэн бол хүүхдийн дээл 55-85 мянган төгрөг гэж байв. Тус брэндийн эрэгтэй, эмэгтэй хантааз 95 мянга, хүүхдийн хантааз 85 мянга, эмэгтэй монгол цамц 110 мянга, эрэгтэй монгол цамц 95-110 мянган төгрөгийн хооронд үнэтэй байв.

         Харин “Iveel” брэндийн эмэгтэй дан дээлний үнэ 125 мянган төгрөгөөс эхэлнэ. Эрэгтэй монгол цамц 135 мянга бол эмэгтэй  цамц 95 мянган төгрөгөөр худалдаалагдаж байлаа. Хүүхдийн цамц нас, хэмжээнээсээ хамаараад 75-85 мянган төгрөгийн хооронд борлуулагдаж байлаа.

“ТҮМЭН ТОРГО” БРЭНДИЙН ДЭЭЛ 299-999 МЯНГАН ТӨГРӨГИЙН ҮНЭТЭЙ БАЙНА

           Монголчуудын нийтээр сонгон үйлчлүүлдэг “Түмэн торго” брэндийн энгийн дугуй хээтэй дээл 299 мянган төгрөг,  энгийн торгомсог дээлний үнэ 389 мянган төгрөгөөс эхлэх бол хатгамалтай дээл нь 499-539 мянган төгрөгийн үнэтэй байлаа. Гар чимэглэл, хүр хорхойн торгон  дээл 829-999 мянган төгрөгийн үнэтэй худалдаалагдаж байна. Тус брэндийн эрэгтэй, эмэгтэй монгол цамц 129-249 мянган төгрөгийн үнэтэй.

ХАНТААЗ ЗАГВАРААСАА ШАЛТГААЛАН 85-289 МЯНГАН ТӨГРӨГИЙН ҮНЭТЭЙ БАЙНА

            Сүүлийн жилүүдэд дээл өмсөхөөс гадна хантааз дангаар нь өмсөх, орчин үеийн хувцастай хослуулан өмсөх нь түгээмэл болсон билээ. Тэгвэл загварын хантааз загвар, брэндээсээ хамаараад үнэ нь 85 мянган төгрөгөөс эхэлж байлаа. “Түмэн торго” брэндийн эмэгтэй хантааз 140-250 мянган төгрөг бол “Дээд” брэндийн хантааз 98 мянган төгрөг, “SONN UP” брэндийн урт хантааз 289 мянган төгрөг гэж байв.

                Дээлтэй загварлаг харагдахад тусалдаг бүсний үнэ 25 мянган төгрөгөөс эхэлж байна. Даалин эмэгтэй бүс загвараасаа хамаараад 60-95 мянган төгрөгийн үнэтэй бол эрэгтэй даавуу болон торгон бүсний үнэ 35-120 мянган төгрөгийн үнэтэй байлаа. Үсний уут загвараасаа хамаараад 15-25 мянган төгрөгөөр худалдаалагдаж байна.Энгийн хромон гутал 200-350 мянган төгрөг бол монгол гутал 3.5 сая хүртэлх үнэтэй байлаа.

Энэ жилийн дээлийн торгоны тэргүүн эгнээнд сонгогдоод байгаа дөрвөн арвайт хээний бэлгэдэл нь арвай мэт өсөж үржих, сайн сайхан дэлгэрэх, эд агуурс арвижих, аливаа үйл хэрэг дэгжих хөгжихийн ажээ. Монгол язгууртнууд, дайчин эрсийн хуяг өмсгөл, эмээлийн гөлөм, дэвс, бүүрэг, дөрөө, хувцас, шууны хамгаалалт буюу харавч, адуу малын тамга, уламжлалт тоглоом, алт мөнгөн аяга, цэргийн зэр зэвсэг тэр дундаа сэлмийн мөр, бариул дээр тус хээг сийлсэн байдаг.

Дээл хээ хур нь тус өөр бэлгэдэлтэй байдаг билээ. Түүнчлэн эрт дээр үед хүүхдэд хээ хуар бүхий дээл өмсөхийг цээрлэдэг байжээ.

    Геометрийн дүрс бүхний зураасан хээ: Энэхүү торгон дээлийн хээ нь усны долгион мэт харагдах бөгөөд гал, цахилгаан, уул, үүл, солонго зэргийг бишрэн гайхаж байсан хамгийн эрт цаг үед үүссэн байгалийн үзэгдлийн хээг агуулжээ

    Гинжин хээ: Хүч чадал, хүсэл зориг, эрч хүчийг бэлгэддэг

    Цэцгэн хээ: Гоёмсог, дур булаам өнгө үзэмж, урин дулаан уур амьсгал, ариун тунгалаг байдал, өсөж үржихийн бэлгэдэл

    Үүлэн хээ: Энэхүү хээ нь хязгааргүй эрх чөлөө, баялаг, хүн бүр аз жаргалтай аж төрөхийг бэлгэднэ

ДЭЭЛИЙН ЦЭЭРЛЭХ ЁС

• Монгол хүн дээлийн захыг хийморь гэж үздэг тул захан дээр гишгэх, уруу харуулан тавихыг цээрлэдэг. Хуучирч хэрэггүй болсон дээл хувцасны захыг ханзалж аваад хаядаг.
• Бүс малгайндаа хийморь байдаг гэж үздэг тул хүний бүс, малгайн дээгүүр алхахыг цээрлэнэ.
• Дээлийн ханцуйг хүч, санааны бэлгэдэл гэж үздэг тул тайлж тавихдаа ханцуйгаа бүсэндээ уяж орхидог. Ханцуйг сул хоосон орхихыг цээрлэдэг.
• Дээлийн ханцуйг дотогш нугалж шамлахыг цээрлэдэг. Энгэр заамаа задгайлж айлд орох, хүнтэй уулзахыг цээрлэнэ. Энгэр задгай хүнтэй таарсан хүн “Хэнтэй гар зөрүүлэх нь вэ?” гээд уулзахгүй явдаг.
• Ах зах хүн, эцэг эхийнхээ дэргэд эмэгтэй хүн уужаа тайлах, эрэгтэй, эмэгтэй ямар ч хүн дотоод энгэр задгайлдаггүй.
• Ахмад буюу албаны хүний дэргэд дээл сугалдаргалах, хормой шуухыг цээрлэдэг.
• Бүсээ бусдын эхнэрээр бүслүүлэх, нар буруу эргүүлж бүсэлж, тайлахыг цээрлэнэ.
• Давхар малгай өмсдөггүй. Хоёр эхнэр буюу  хоёр нөхөртэй болохын ёр гэдэг.
• Гутлын түрий эргүүлэхийг муу ёр гэж үздэг. Учир нь “Хонгор азарга” гэдэг эрүү шүүлтэд оруулах хэрэгтний гутлын түрийг эргүүлдэг байжээ.
• Гутлын улыг бурхан шүтээн рүү харуулж тавьдаггүй.
• Малгайг хүнд бэлэглэдэггүй. Уруугаа харсан сав тул буян хишгээ асгана гэж үздэг. Хүнээс малгай бэлэгт авах бол бэлгэдлээр хэдэн ч хамаагүй багахан мөнгө өгч байж авдаг.
• Гэрт, гадаа хаа ч эмээлийн бүүргийг буруу харуулж тавьдаггүй.
• Хутга мэсээр газар бүлдэггүй. Амандаа зуудаггүй.
• Хайчны амыг хоосон ангалзуулдаггүй. Чонын ам ширүүсэж мал хорогдоно гэдэг.
• Дээлийн зах, гутлын түрийг гал руу харуулж тавьдаггүй.
• Сампин хоосон эргүүлдэггүй. Өрөнд орно гэж цээрлэдэг.