Хөл хорионы өдрүүдэд СЭТГҮҮЛЧИД хэрхэн ажиллаж байна вэ

Б. Цогтбаяр:
Монголчуудын амьдрал- Өдрийн сурвалжилга

2020-12-03, 2294

"COVID-19" цар тахлын улмаас улс даяар "Бүх нийтийн бэлэн байдлын зэрэг"-т шилжиж, хатуу хөл хорио тогтоосноос хойш хэвлэл мэдээллийн байгууллагууд өндөржүүлсэн бэлэн байдалд ажиллаж, мэдээлэх үүргээ гүйцэтгэж байна. Ergelt.mn мэдээллийн сайт Монголын хэвлэл мэдээллийн байгууллагуудын сэтгүүлчид хөл хорионы өдрүүдэд ажил үүргээ хэрхэн гүйцэтгэж байгааг сурвалжиллаа.

Тэр дундаа сэтгүүлчид олон нийтэд шуурхай, тэнцвэртэй, үнэн бодит мэдээлэл хүргэх үүргээ биелүүлэхэд хөл хорионы дэглэм хэрхэн нөлөөлж байна вэ, ямар давуу болон сул тал олгож байна вэ, хөл хорионы өдрүүдэд ямар арга барилаар ажиллаж байна вэ, техник, технологийн дэвшилийг хэрхэн ашиглаж байна вэ гэсэн асуултад хариулт авлаа.

“Eagle” телевизийн сурвалжлагч Б.Амарбаян: Хөл хорионы үед ажиллах нь эрсдэлтэй ч өөрийгөө хөгжүүлэх, шинэ арга барилд суралцах боломж

Би 2015 онд СУИС-ийн Радио телевиз, медиа урлагийн их сургуулийг сэтгүүлч мэргэжлээр төгссөн. Сургуулиа төгсөөд "MNC" телевизээс ажлын гараагаа эхлээд, 2019 оны есдүгээр сараас “Eagle” телевизийн мэдээний албанд сэтгүүлчээр ажиллаж байна. Сэтгүүлч мэргэжлээр ажиллаж эхэлснээсээ хойш анх удаа хөл хорионы дэглэмийн үед ажиллаж байна.

Хөл хорионы өдрүүдэд ажиллах нь нэг талаас эрсдэлтэй мэт харагдавч нөгөө талаас өөрийгөө хөгжүүлэх, техник технологийн дэвшлийг ашиглан хялбар аргаар ажиллах боломж олгож байна гэж миний зүгээс харж байгаа.

Өөрөөр хэлбэл, телевизийн мэдээ сайт, сонины мэдээнээс ялгаатай нь заавал видео дүрстэй байдаг. Бид нэг мэдээнд 3-4 яриа ашиглана гэж үзвэл заавал тухайн хүмүүс рүү очиж, яриаг нь дүрсжүүлэн авах ёстой болдог. Харин хөл хорионы өдрүүдэд урьдынх шигээ гадуур явах нь эрсдэлтэй, нөгөө талаасаа бидэнд яриа өгөх хүн, албан тушаалтан тун цөөн, төрийн байгууллагууд цахимаар ажиллаж байгаа учраас бид биечлэн уулзах боломжгүй байгаа. Ийм учраас бид эх сурвалжтайгаа онлайнаар шууд холбогдож, мэдээллээ авч байна. Заавал биечлэн уулзаж, ярилцлага авдаг байсан үетэй харьцуулахад технологийн тусламжтайгаар нэг шат илүү ахиж байна гэж харж байна. Энэ нь бидэнд эрсдэлгүй бөгөөд мэдээ, мэдээллээ шуурхай авах боломж олгож байна.

Телевиз гэдэг бол бүх нийтийн амралт, хөл хорио гээд бүхий л үед ажиллаж байдаг. Ялангуяа хөл хорионы энэ үед өрх бүр гэртээ телевизээ үзэж байгаа. Тийм учраас бид иргэдийг мэдээллээр хангах үүргээ ямар ч нөхцөлд биелүүлж, эфирээ таслахгүй байх ёстой. Манай байгууллага энэ өдрүүдэд ээлжээр ажиллаж байгаа. Ингэхдээ сэтгүүлч, зураглаач нараа хоёр багт хуваагаад эхний баг нь долоо хоногийн дөрвөн өдөр, дараагийн баг нь гурван өдөр гэх мэтээр ээлжлэн ажил үүргээ гүйцэтгэж байна. Өөрөөр хэлбэл, УОК, ДЭМБ-аас гаргасан нэг өрөөнд олон хүн цуглуулахгүй байх, хүн хоорондын зай барих гэх мэт зөвлөмжүүдийг ажлын байран дээрээ мөрдөн ажиллаж байна гэсэн үг.

Хөл хориог өвчин, цар тахал гэхээс илүү гэртээ байж өөрийгөө хөгжүүлэх, гэрийнхэндээ цаг гаргах боломж гэж эерэгээр харах нь зөв болов уу. Жишээ нь, онлайнаар гэрээсээ ажиллаж байлаа гэхэд өдрийн талд нь ажлаа хийгээд бусад цагт нь онлайн сургалтуудад сууж, гэр бүлийнхэндээ цаг зав гаргаж, цагийг хөгжилтэй өнгөрөөх хэрэгтэй. Тиймээс та бүхэн шаардлагагүй нөхцөлд гэрээсээ гарахгүй байж, халдвар хамгааллын дэглэмээ сайн сахиж, гарах шаардлагатай нөхцөлд амны хаалт тогтмол зүүж, эрсдэлээс өөрийгөө болон өрөөл бусдыг хамгаалаарай.

МҮОНР-гийн "P3" радиогийн редактор Э.Ганхуяг: Өөрийнхөө бүтээсэн контентыг дижитал орчинд хөгжүүлэх, сонсогчидтойгоо шууд харилцах боломж гарч ирж байна

Хөл хорионы өдрүүдэд манай радиогийн редакторууд хоёр хоёроороо ээлжлэн, нэг өдөр ажиллаад, нэг өдөр амрах, ийм зохицуулалтаар 14 хоног ажиллаад, өөр дөрвөн редактортой ээлж солилцох зарчмаар ажиллаж байгаа. Ажлын байран дээрээ нэг удаагийн амны хаалт, гар ариутгагч, бээлий хэрэглэж, халдвар хамгааллыг сайн сахиж байна. Удирдлагын зүгээс халдвар хамгааллын хэрэгслээр хангах, хяналт тавих ажлыг сайн хийж байгаа.

Хөл хорионоос өмнө нь зочноо студид урьж, шууд эфирт ярилцдаг байсан. Харин хөл хорионы өдрүүдэд зочинтойгоо онлайнаар ярилцах, тэр дундаа зөвхөн Улаанбаатар хот биш, дэлхий нийтэд амьдарч байгаа хүмүүстэй Zoom болон бусад харилцааны платформуудыг ашиглан ярилцах ийм боломж бүрдэж байна. Хэдийгээр өмнө нь энэ бүх боломж байсан ч төдийлөн ашигладаггүй байсан юм байна. Энэ бол хөл хорионы үед ажиллаж байгаагийн нэг давуу тал гэж харж байна. Сул тал гэвэл олон талын эх сурвалжтай мэдээлэл дамжуулахад эх сурвалж хязгаарлагдмал байх асуудал гарч ирж байна.

Түүнчлэн хөл хорионы үед өөрийнхөө хийж байгаа контентыг дижитал орчинд хөгжүүлэх, түгээх, хэдэн хүн үзэж байгааг ил тод харах боломжууд гарч ирж байна. Тухайлбал, залуучууд ямар платформоор радиог хүлээн авч байна, хэдээс хэдэн насны залуучууд радио сонсож байна, аль улсын аль хотод илүү олон сонсогч байна гэх мэт мэдээллүүдийг шууд харж болж байна. Мөн сонсогч нараасаа сэтгэгдэл хүлээн авах, хариулах, санал, шүүмж сонсох гэх мэтээр сонсогчидтойгоо илүү ойр ажиллах боломжтой байна.

“Зууны мэдээ” сонины Улс төр, эрэн сурвалжлах, тоймчдын албаны сэтгүүлч С.Уянга: Цар тахлын хөл хорионы үед бид шуурхай мэдээллээс илүүтэй гамшгийг хохирол багатай даван туулж байгаа гадаад орны туршлага, мэргэжлийн экспертүүдийн байр сууриудад дүн шинжилгээ хийж асуудал дэвшүүлсэн нийтлэл бичихийг эрмэлзэж байна

Манай сонин үндэсний өдөр тутмын томоохон сонинуудын төлөөлөл учраас хөл хорионы өдрүүдэд нэг ч дугаар өнжөөгүй. Үнэнч уншигчдадаа мэдээ мэдээллийг өдөр алгасахгүй бэлтгэн хүргэж байна.

Цар тахлын халдвар тархсан үед өдөр бүр сониноо хийж байгаа ч өөрсдийгөө болон бусдыг эрсдэлд оруулахгүйн тулд төрийн шийдвэрийн дагуу цахимаар ажиллаж, олон нийтийг мэдээллээр хангах үүргээ биелүүлж байна. Редакцийн зүгээс сэтгүүлчдийнхээ гэр бүлийг эрсдэлд оруулахгүй байх үүднээс гэрээс нь ажиллуулах бодлого баримталж ирсэн. Өнгөрсөн хавар дэлхий нийтэд коронавирус халдварын тархалт идэвхитэй бүртгэгдэхэд манай сонин 3-4 сар тасралтгүй цахимаар ажилласан. Тэр туршлага дээрээ үндэслээд энэ удаад цахимаар ажиллахад ямар нэг хүндрэл гарахгүй байгаа. Өглөөний шуурхай хурлаа Zoom-ээр хийж тухайн өдрийн үйл явдлаа ярилцаж, сонины нүүр тус бүрд орох материалаа төлөвлөдөг. Харин эх бэлтгэгч болон тухайн өдрийн дугаар удирдагч ажил дээр ирж, зохицуулалт хийдэг. Бусад нь гэрээсээ ажиллах журмаар хөл хорионы өдрүүдэд зохион байгуулалт хийж байна.

Өдөр тутмын сонин гэдэг цаг үеийн шуурхай мэдээлэлд хөтлөгдөхөөс илүү үйл явдалд дүн шинжилгээ хийсэн, гарц гаргалгаатай, тэнцвэртэй, үнэн бодит мэдээллийг хүргэдгээрээ онцлог. Нэг үгээр бол даацтай бүтээл төрүүлдэг. Энэ цаг хугацаанд өрнөж буй үйл явдал, төр засгийн шийдвэрийг сонин архивлаж байдаг учраас 1000 жилийн дараа ч сонины хуудаснаас харж болдгоороо давуу талтай. Тиймдээ ч өдөр тутмын сонины “гал тогоо”-нд ажиллаж байгаадаа үргэлж бахархдаг.

Цар тахлын нөхцөл байдлын үед ч мөн адил бид шуурхай мэдээллээс илүүтэй гамшгийг хохирол багатай даван туулж байгаа гадаад орны туршлага, мэргэжлийн экспертүүдийн байр суурь, дүн шинжилгээ хийж асуудал дэвшүүлсэн нийтлэл зэргээр олон төрлийн гарц гаргалгаа эрэлхийлж тасралтгүй сониноо үйлдвэрлэж, архивласаар байна. Өнөө үед дан ганц сонин хэвлэхээс гадна цаг үеэ дагаад бүгд л цахим сайттай болсон нь илүү дэвшил, боломж гэж хэлж болно.

Хөл хориотой холбоотойгоор олон хүнтэй уулзах боломжгүй болж8 эх сурвалжаа цахим болгох шаардлага тулгарч байгаа ч үүнийг дэвшил гэж харж олзуурхан ашиглаж байна. Зочиндоо асуулт бэлтгэж илгээх, утсаар ярилцах, дүрсээ харж байгаад видеогоор ярилцах зэргээр олон арга хэлбэрээр контентоо бэлтгэж байна. Тухайлбал, эх сурвалжаа цахим болгох шинэ арга барилын хүрээнд гадаадын олон оронд амьдарч буй bонголчууд хөл хориог хэрхэн даван туулж буйг харуулсан буланг цувралаар бэлтгэн хүргэхээс гадна эгзэгтэй үед эдийн засаг, дундаж давхаргыг хэрхэн хамгаалах талаар экспертүүдийн байр суурь, гарц гаргалгааг нийтэлсээр байна. АНУ л гэхэд коронавирустэй бүтэн жил тэмцэж байна. Харин манай улсад хөл хорио тогтоогоод сар ч хүрээгүй. Тиймээс АНУ-ын халдвараас сэргийлэх хамгийн үр дүнтэй туршлага болох зургаан алхмын дэглэм, цар тахлын үед өөрийгөө хэрхэн хөгжүүлж болох вэ зэргээр бусдаас суралцах олон боломж өнцгийг уншигчдадаа хүргэж байгаа.

“Гэмт хэргээс урьдчилан сэргийлэх зөвлөл”-ийн Олон нийттэй харилцах албаны ажилтан М.Уянга: Гэмт хэргээс урьдчилан сэргийлэх чиглэлээр цахим сүлжээнд аян өрнүүлж байна

Коронавируст халдвар, цар тахлаас урьдчилан сэргийлэх зорилгоор бүх нийтийн бэлэн байдлын зэрэгт шилжиж, хатуу хөл хорио тогтоосонтой холбоотойгоор төрийн байгууллагууд цахимаар ажиллаж байна. Үүнтэй холбоотойгоор “Гэмт хэргээс урьдчилан сэргийлэх зөвлөл”-ийн ажилтнууд ч мөн цахим хэлбэрээр ажиллаж байгаа. Өнгөрсөн арваннэгдүгээр сарын 25-ны өдрөөс Монгол Улсын Засгийн газар, НҮБ-ын Хүн амын сан хамтарч, Жендерт суурилсан хүчирхийллийн эсрэг 16 хоногийн аяныг “Яг одоо мэдээлье, оролцъё, ярилцъя” гэсэн уриатайгаар зохион байгуулж байгаа. Энэ хүрээнд олон нийттэй харилцах хэлтсээс постер, шторк бэлтгэх, олны танил хүмүүсийг уриалж, нэгтгэх ажлыг гүйцэтгэж байна. Хөл хорионы эдгээр өдрүүдэд зөвлөмж, мэдээллүүдээ фэйсбүүк, твиттер, инстаграм зэрэг олон нийтийн сүлжээг ашиглан иргэдэд хүргэж байна.

MPA.mn сайтын ерөнхий эрхлэгч, Гэрэл зурагчин Б.Бямба-Очир: Олон улсын мэдээллийн агентлагуудын туршлагыг нэвтрүүлэхээр ажиллаж байна

Хөл хорионы үед ажилтнуудаа ээлжээр ажиллуулж байна. Нэгдүгээрт, ажилчдынхаа аюулгүй байдлыг хангах. Хоёрдугаарт, хөл хорионы хүнд үеийг санхүүгийн хувьд эрсдэл багатай даван туулах үүднээс ийм горимоор ажиллаж байна.

Хөл хорионы үед мэдээ, мэдээлэл бэлтгэхэд эх сурвалж хязгаарлагдмал байгаа нь асуудал болж байна. Гэсэн ч бид олон улсын мэдээллийн агентлагуудын онцгой нөхцөлд хэрхэн ажиллаж байгааг судалж, тэр туршлагыг нь редакцдаа нэвтрүүлэхээр ажиллаж байгаа.

Хөл хорионы өдрүүдэд СЭТГҮҮЛЧИД хэрхэн ажиллаж байна вэ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.