Улаанбаатар хотын иргэдийн тав тухтай орчинг бүрдүүлэх зорилгоор явган хүний зам, хашлага зэргийг энэ сард Нийслэлийн Захирагчийн албанаас шинэчлэл засвар хийхээр шийдвэрлэж, ажил эхлүүлээд байна. Гэвч үүнээс өөр томоохон бүтээн байгуулалт, төсөл хөтөлбөрүүд нийслэлд хэрэгжсэнгүй бололтой. Хаашаа л харна, нөгөө л түгжрээн дунд бухимдах иргэд, автобусныхаа буудалд багтах зайгүй зогсоно. 

БРОДЮР, ЯВГАН ХҮНИЙ ЗАМАА ХАГАС ДУТУУ ШИНЭЧЛЭЭД ЭНЭ ЗУНЫ БҮТЭЭН БАЙГУУЛАЛТ ӨНДӨРЛӨХ АЯТАЙ 

            Үдийн нар хэвийх үеэр хотын төвд өрнөж байгаа бүтээн байгуулалтыг өөрийн нүдээр тольдохоор хэд, хэдэн газрыг зорьсон юм. Иргэд халуун наранд байшин, барилгын сүүдэр бараадан нарийхан явган хүний замаар цуварч алхана. Хоорондоо мөргөлдөх шахуу, зөрөхийн ч эцэсгүй давчуу замаар алхах нь хүндрэлтэй харагдах бөгөөд машин замруу түлхэгдэх хөл алдан гишгэх хүн цөөнгүй. Тэр байтугай зарим газраа алхах зай ч үгүй шороо тоостой жим шахуу замаар цувсаар автобусны буудал дээр ирээд сэтгэл уужирлаа.

           Улсын драмын эрдмийн театраас Баянгол зочид буудлын автобусны буудал хүртэлх зам дагуух явган хүний замыг наймдугаар сарын 8-12-ны өдрийг хүртэл стандартын дагуу шинэчлэх ажил өрнөсөн байна. Тус газарт очиж үзэхэд өмнөх явган хүний замын хэмжээнээс бага зэрэг хэдэн см-ээр өргөжүүлсэн харагдана. Гэсэн ч иргэдийн хөдөлгөөн үл тасрах тэрхүү замаар зөрж алхахад ч хүндрэлтэй хэвээр л байлаа. Түүнчлэн замын бродюрийг нэг бүрчлэн сольж, шавар цементээр бэхжүүлсэн байна. Зарим газраа зай завсар гарч, удахгүй салж унах дөхсөн харагдах бөгөөд бүрэн, дүүрэн хийж дуусгаагүй аж. Иргэдийн ярьж байгаагаар “Замын тохижолтын ажил үргэлжилж байх явцад энэ хавиар явахад хүндрэлтэй байсан. Гэхдээ засаж, шинэчилж байгаад нь дотроо баярлаж байна. Харин дараа нь харахад бага зэрэг л өөрчлөлт оруулсан төдий, хэдэн бродюр өрж тавиад ажлаа дуусгачихсан байв. Хийж, шинэчлэх гэж байгаа бол бүрэн хиймээр юм даа” хэмээн учирлаж байлаа. Засвар хийснээс дөрөв хоногийн дараа харахад тухайн замын хажуугаар хэсэг бродюр өрсөн байдалтай харагдана. 

НИЙСЛЭЛИЙН ХЭМЖЭЭНД НАЙМДУГААР САРД ТОХИЖОЛТЫН АЖЛЫГ ИХЭЭР ӨРНҮҮЛЖЭЭ

        Нийслэлийн зарим газруудад тодорхой төсөл, арга хэмжээнүүд эрчимтэй явагдаж байгаа гэх. Тэгвэл тэдгээрийн ихэнх нь явган хүний зам, цэцэрлэг байгууламж зэргийг сэргээн засварлахад чиглэж байгаа аж.  

      Энэ хүрээнд Нийслэлийн удирдлагууд хэрхэн арга хэмжээ авч эхэлсэн талаар холбогдох албан тушаалтнуудаас тодрууллаа. Тухайлбал, Улаанбаатар хотын Захирагчийн ажлын албанаас “Шарилжгүй Улаанбаатар” аяны эхний үе шатыг зургаадугаар сарын 25-наас долдугаар сарын 10-ны хооронд хэрэгжүүлсэн байна. Ингэхдээ хөл газрын ургамлыг тайрах, танах ажилд нийслэлийн есөн дүүргийн 10 мянга 234 аж ахуйн нэгж, байгууллагын 34 мянга 604 ажилтан, албан хаагчид оролцож, нийтийн эзэмшлийн нэг сая 461 мянган ам метр талбайг цэвэрлэжээ. Үүний дараа нэг мянга 952 тонн шарилж, хог ургамлыг тайрч цэвэрлэж, төвлөрсөн хогийн цэгүүдэд зөөвөрлөн, устгаад байгаа юм. Мөн түүнчлэн Нийслэлийн Захирагчийн албанаас хуучны гэх тодотголтой сургууль цэцэрлэгийн гадна талыг сэргээн засварлах, дулааны алдагдлыг бууруулах ажил хийгджээ. Одоогоор хийгдэж буй ажлуудаас дугуй цагаан орчимд хүүхдийн модон тоглоом, явган зам, сити 00, тойрог бүхий тохижилтын талбай, террас, ногоон байгууламж, гэрэлтүүлэг, камержуулалт хийжээ. Тус байршилд тохижилтын ажлыг гүйцэтгэж буй компани нь “Цагаан толгой нуур” ХХК аж. Явган хүний замын засварын ажил их сургуулийн гудамж, бага тойруу, Ж.Самбуугийн гудамж зэрэгт мөн хийгджээ. Явган замыг хотын төвд багадаа 2.5-3 метр, цаашлаад 5-7 метр хүртэл өргөсгөн тохижуулахаар шийдвэрлэсэн байна. 

ИРГЭД: ДАРГА НАР ТӨЛӨВЛӨСӨН АЖЛАА ДУТУУ ХИЙЦГЭЭЖ БАЙНА

           Зарим газраар замын төгсгөлийг дутуу засаад орхижээ. Мөн газарт шороо дэвсэн, явган замын ажлыг дөнгөж эхлүүлээд орхисон байлаа. Замыг тойруулсан хаалтын тууз тасарч хүмүүс түүгээр зорчих болоод удаж буй гэнэ. 

           Иргэд “Яагаад гүйцэт хийчихэж болоогүй юм бол оо. Дутуу орхисон замын ажлууд цөөнгүй харагдаж байна. Хагас орхисон хэсэг дээрх шороон замаар алхах үед шороо нь суларч алхахын аргагүй болох юм” гэлээ. Хуучин замыг нь ховхлож, элэгдсэн замын хучилгыг нэг талд өрж тавиад, нөгөө талд шинээр хучих материалуудыг цувруулан тавьсан байлаа. Энэ үед шороон замын хэсэг дээр хажуугаар зөрөх нэгэн эмэгтэй “Хэдхэн хоногийн өмнө Улаанбаатар хотын захирагч Д.Сумъяабазар шалгалт хийж, танилцаад явсан. Явсных нь дараа хийж гүйцэтгэсэн ажилчид нь хагас дутуу хийсэн болчихоод алга болсон байна. Хэдий болтол ийм байдалтай байхыг бид мэдэхгүй байна” гэв.

         Гэх мэтчилэн төсөв мөнгөө зарцуулсан томоохон ажлуудых нь дунд, явган хүний зам, цэцэрлэг ногоон байгууламжийн тохижолтын ажлыг бүрэн дуусгаж, шийдэж чадаагүй л явна.