ЭХЭМҮТ-д хүүхдээ үзүүлж, хэвтүүлэх цаг авахаар зогсох хүмүүсийн ихэнх нь нярай хүүхэдтэй ээжүүд. Нэг ой хүрээгүй болов уу гэмээр хүүхдүүд олон хүнтэй танхимд амны хаалтгүй байгаа нь цар тахалтай энэ үед ихээхэн эрсдэлтэй харагдаж байв. Халдвар хамгааллын дэглэм барихгүй, бүгчим эмнэлгийн танхимд хүүхдээ үзүүлэхээр очихдоо амны хаалт зүүлгэчихвэл олон халдварт өвчнөөс хамгаалмаар. Гэвч гэртээ байгаа аятай амны хаалтгүй, гадуур хувцсыг нь тайлчихсан зогсож байлаа. Ийн бодож зогстол гаднаас хүүхдээ тэвэрсэн эхнэр, нөхөр хоёр орж ирснээ үүдэнд зогсох эмнэлгийн ажилтнаас "Үзүүлэх хүмүүс нь хэзээ багасах бол" гэж асуухад, эмнэлгийн ажилтан "Манайх 17:00 цаг хүртэл хүн ихтэй байдаг" гэж хариулахад "Энэ ч бүтэхгүй юм байна даа" гэсээр гарч одов. Энэ мэтээр яарч тэвдсэн, хүүхдийнх нь бие өвдсөн эцэг, эхчүүд эмчид үзүүлэхээр, эсвэл эмнэлэгт хэвтүүлэхдээ заавал дараалалд зогсож, цаг авахаас өөр аргагүй байлаа. Энд дараалалд зогсох хүмүүсээс гадна хүлээлгийн сандал дээр хэдэн арван хүн сууж харагдана. Тэр дундаас аавынхаа мөрийг түшин, байн байн хүчтэй ханиалгах хүү анхаарал татна. Ингээд бид хүүгийн аавтай ярилцахад "Хүү маань дөрвөн настай. Дархлаа сул болохоор жаахан дараад л ханиад хүрчихнэ. Уг нь сарын өмнө коронавирус тусаад эдгэрсэн юм. Гэтэл хэд хоногоос ханиалгаад, халуураад болдоггүй ээ. Тэгээд өрхийн эмнэлэгт үзүүлсэн чинь ханиад нь хүндэрч хатгалгаа авсан байна гэсэн. Тиймээс ЭХЭМҮТ-д хэвтүүлэхээр ирлээ” гэв. Ийнхүү халуурч, бүлээрсэн хүүхэд байх бөгөөд тус эмнэлэг 07:00-17:00 цаг хүртэл дайн болж байна уу гэмээр ачаалалтай ажиллаж байгаа аж.

  Хүлээн авахын танхимаас гараад бид Яаралтай тусламжийн тасаг хүрэв. Хүлээлгийн танхимыг бодоход энд хүн цөөн, нам гүм байх бөгөөд ихэнх нь эмнэлэгт хэвтсэн хүн эргэхээр ирсэн нь тортой хувцас, халуун  савтай хоол, цай барьснаас нь харагдана. Эмнэлгийн ажилтан жижиг цонхоор иргэдтэй харилцах бөгөөд бүртгэл хийн, авчирсан зүйлсийг нь цааш авч орно. Энэ үед гаднаас халамцуу бололтой хоёр эмэгтэй орж ирээд, үрчийж хорчийсон эмчийн бичиг бололтой цаас эмнэлгийн ажилтанд өгөөд эмнэлэгт хэзээнээс хэвтэж болохоо асуув. Гэтэл эмнэлгийн ажилтан "Би асуугаад хариу хэлье, хүлээж байгаарай" гэтэл өнөө эмэгтэй "Юунд нь асуудаг юм. Миний бөөр өвдөөд, одоо бөөрөөр суух нь, хурдан намайг хэвтүүлээд өг" гэж бухимдав. Энд эргэлтээр ирэх хүмүүсээс гадна эмнэлэгт яаралтай хэвтэх гэсэн хүмүүс ч ирдэг байна.

  Харин бид дараа нь тус төвийн Эх барих эмэгтэйчүүдийн эмнэлгийн танхимаар оров. Энэ бол халдвар хамгааллын дэглэм хамгийн хариуцлагатай барих танхим. Энэ ч утгаар гадны хүн оруулахгүйгээр үүднээс нь ямар хэргээр явааг асууж, зайлшгүй үзүүлэх иргэдэд л үйлчилж, жирэмсэн дөрвөн хүн сандал дээр сууж байв. Ажваас гурав нь үзүүлэх гэж ирсэн бололтой, харин нөгөө нэг нь тортой хувцас, цүнх барьснаас харахад төрөх дөхөөд эмнэлэгт иржээ. Тус эмэгтэйгээс эмнэлгийн орчин нөхцөл, эмч нарын ачаалал, үйлчилгээний талаар тодруулахад "Эмнэлэгт халдвар авах эрсдэл өндөр байна. Би өмнөх долоо хоногт өвдөөд хэвтэхээр иртэл, "Төрөх арай болоогүй байна" гээд буцаасан. Урьд шөнө өвдөөд, сая хамаг юмаа баглаад хэвтэхээр ирлээ. Одоо эмчид үзүүлэх гээд сууж байна. Мэдээж эмч нар халдвар авах  эрсдлийг тооцож аль болох хэвтүүлэхгүйг бодож байгаа байх. Гэхдээ эртхэн эмнэлэг бараадсан нь надад амар байна" гэв. Ийнхүү ЭХЭМҮТ-д ханиад нь хүндэрч хатгалгаа болсон хүүхдүүдийн тоо эрс нэмэгдсэн бол үүнтэй зэрэгцээд бусдад элдэв өвчин халдварлуулах, ковид, омикроны халдвар бусдаас авах зэрэг эрсдэл, аюул нэг дор, нэг байшинд "тэсрэх бөмбөг" шиг л оршиж байна.