Хөл хорионы өдрүүдэд хэрэгжих үйл ажиллагаа

А. Азсайхан:
Монголчуудын амьдрал- Мэдээ мэдээлэл

2021-04-27, 478

Монгол Улсын Засгийн газрын 2021 оны дөрөвдүгээр сарын 23-ны өдрийн 105 дугаар тогтоолоор дөрөвдүгээр сарын 25-наас тавдугаар сарын 8-ны өдрийн 06:00 цаг хүртэл 12 хоногоор бүх нийтийн бэлэн байдлын зэргийн хугацааг сунгасан.

Энэ удаагийн 12 хоногийн хөл хориог үр дүнтэй болгох, иргэдийн зорчих хөдөлгөөнийг хязгаарлах, халдвар тархах эрсдэлийг бууруулах, вакцинжуулалтын ажлыг халдвар хамгааллын дэглэмийг алдагдуулахгүйгээр эрчимтэй зохион байгуулахын тулд өмнөх хөл хорионоос илүү хатуу чанд зохицуулалтыг хэрэгжүүлэн ажиллаж байна.

Хөл хорионы өдрүүдэд төрийн болон хувийн хэвшлийн зөвшөөрөгдсөн 15 байгууллагын ажилтнууд ажилдаа ирэх, буцах цагийг /өглөө 07:00-09:00, орой 17:00-20:00/ тогтоож, өдрийн цагаар ажлын шаардлагаас бусад тохиолдолд зорчихыг хориглосон бол иргэдийн хувьд эмнэлгийн зайлшгүй тусламж, үйлчилгээ авах, эмийн сан орох, үзлэгийн цаг авсан, жирэмсэн хүмүүс эмнэлгийн бичгээ үзүүлээд цаг харгалзахгүй зорчих боломжтой.

Түүнчлэн иргэд өмгөөлөл, нотариатаар үйлчлүүлэхдээ 10:00-16:00 цагт үйлчлүүлэх, хүнс, ахуйн хэрэглээний бараа, түлш, зөөврийн ус авахдаа оршин суугаа хорооны болон хамгийн ойр хүнсний дэлгүүр, борлуулалтын цэг, худгаар үйлчлүүлэх, оршуулгын ажилд оролцох бол нийт автомашин тав, 10 иргэнээс хэтрэхгүй байхаар журамлажээ.

Мөн хугацаанд иргэд та бүхэн халдвар хамгааллын дэглэмийг сайтар сахих, өрөө тасалгаандаа тогтмол цагуудад агаар сэлгэж байх, айлд зочлохгүй, зочин урихгүй байх, шаардлагагүй тохиолдолд гэрээс гарахгүй байх, гарсан тохиолдолд хүн хооронд хоёр метрээс доошгүй зай барих, гэрийнхээ ойр орчмын 50 метрээс хол агаарлаж явахгүй байх, олон нийтийн газар очихгүй байх, мэргэжлийн байгууллагаас гаргасан заавар, зөвлөмжийг ягштал баримтлах, халдварын шинж тэмдэг илэрсэн тохиолдолд 100, 119, өрхийн эмнэлэг рүү утасдан мэдэгдэж, эмнэлзүйн заавар утсаар зөвлөгөө авна.

Хөл хорионы өдрүүдэд хэрэгжих үйл ажиллагаа

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.