Нийслэлийн прокурорын газраас Авлигатай тэмцэх газар, Тагнуулын Ерөнхий газар, Цагдаагийн Ерөнхий газрын Мөрдөн байцаах алба, Эрүүгийн цагдаагийн алба, Экологийн цагдаагийн алба, Хар тамхитай тэмцэх газрын хүлээн авч шалгаж буй гэмт хэргийн шинжтэй гомдол, мэдээлэл, эрүүгийн хэрэгт тус тус хяналт тавин ажилласан байна.  

Нийслэлийн прокурорын газраас 2021 оны нэгдүгээр улиралд 358 гэмт хэргийн талаарх гомдол, мэдээлэл, 773 эрүүгийн хэрэгт хяналт тавьж ажиллажээ.

Хяналт тавьж ажилласан гэмт хэргийн шинжтэй гомдол, мэдээлэл 22 буюу 6.5 хувиар өсч, эрүүгийн хэрэг 106 буюу 12.0 хувиар буурсан байна.

Хэрэг бүртгэлт явуулсан 597 хэрэгт хяналт тавьж, 10.7 хувь буюу 64-д нь эрүүгийн хэрэг үүсгэн, яллагдагчаар татаж, 11.8 хувь буюу 71 хэргийг хааж, ажиллагаанд 456 хэрэг шалгагдаж байна.

Мөрдөн байцаалтын 242 хэрэгт хяналт тавьж ажилласнаас 83 буюу 34.2 хувьд нь яллах дүгнэлт үйлдэн шүүхэд шилжүүлж, 3 буюу 1.2 хувийг түдгэлзүүлж, 5 буюу 2.0 хувийг нь хэрэгсэхгүй болгож, ажиллагаанд 126 хэрэг шалгагдаж байна.   

Хяналт тавьсан мөрдөн байцаалтын нийт хэргийн 95 буюу 39.2 хувийг Авлигын гэмт хэрэг, 68 буюу 28.0 хувийг Мансууруулах бодистой холбоотой гэмт хэрэг эзэлж байгаа нь хамгийн их байна.

- 2021 оны 1 дүгээр улиралд яллах дүгнэлт үйлдэн шүүхэд шилжүүлсэн хэрэг:

Нийслэлийн прокурорын газар нь мөрдөн шалгах ажиллагааны цар хүрээ ихтэй эдийн засгийн болон авлига, албан тушаалын хэргүүд, түүнчлэн улс орон дамжиж үйлдэгдсэн, мөнгө угаах хэргүүдийг бүрэн, шуурхай шалгуулах зорилгоор олон талт удирдлага зохион байгуулалтын арга хэмжээ авч хэрэгжүүлэн ажилласны үр дүнд 2021 оны нэгдүгээр улирлын байдлаар 242 хэргийн 83 буюу 34.2 хувьд нь яллах дүгнэлт үйлдэн шүүхэд шилжүүллээ. Урьд оны мөн үетэй харьцуулахад яллах дүгнэлт үйлдэж шүүхэд шилжүүлсэн хэрэг 3.5 хувиар өсөв. Тухайлбал:

- Б.Баттүвшин нарт холбогдох “Жижиг, дунд үйлдвэрийг хөгжүүлэх сангийн захирлаар ажиллаж байхдаа албан тушаалын байдлаа урвуулан ашигласан, мөнгө угаасан үйлдэлтэй” эрүүгийн хэрэгт 2021 оны нэгдүгээр сарын 25-ны өдөр Эрүүгийн хуулийн тусгай ангийн 22.1 дүгээр зүйлийн хоёр, 18.6 дугаар зүйлийн хоёр дахь хэсгийн 2.2-д зааснаар яллах дүгнэлт үйлдэж Cүхбаатар дүүргийн шүүхэд шилжүүлэх шилжүүлэх ажиллагаа хийгдэж байна.

- Холбооны Бүгд Найрамдах Нигери улсын иргэн Адекола Олавасен Азеез нарт холбогдох “Мансууруулах бодис хилээр нэвтрүүлсэн, бусдад худалдсан, хадгалсан үйлдэлтэй...” хэрэгт 2020 оны хоёрдугаар сарын 3-ны өдөр Эрүүгийн хуулийн тусгай ангийн 18.5 дугаар зүйлийн гурав, 20.7 дугаар зүйлийн нэг, 20.7 дугаар зүйлийн хоёр дахь хэсэгт зааснаар яллах дүгнэлт үйлдэж Баянгол дүүргийн шүүхэд шилжүүлсэн. Шүүхэд хэрэг хянан шийдвэрлэх ажиллагаа явагдаж байна.

- Б.Цэрэн-Очир нарт холбогдох “Улсын Их Дэлгүүрийн дээврийн засварын ажил хийж байх явцдаа ил гал алдаж бусдад их хэмжээний хохирол үйлдэлтэй...” хэрэгт 2021 оны гуравдугаар сарын 25-ны өдөр Эрүүгийн хуулийн тусгай ангийн 17.11 дүгээр зүйлийн хоёр дахь хэсэгт зааснаар яллах дүгнэлт үйлдэж, Чингэлтэй дүүргийн шүүхэд шилжүүлсэн. Шүүхэд хэрэг хянан шийдвэрлэх ажиллагаа явагдаж байна.

- Гэмт хэрэг үйлдэж олсон хөрөнгө, орлогыг хураан авсан ажиллагааны үр дүнгийн талаар.

Нийслэлийн прокурорын газраас Авлига албан тушаалын гэмт хэрэг, мөнгө угаах гэмт хэргүүдэд холбогдсон этгээдэд зөвхөн ял шийтгэх бус хууль бусаар олсон хөрөнгө орлогыг хурааж улсын орлого болгох, мөрдөн шалгах ажиллагааны явцад түүнийг хамгаалах тал дээр онцгойлон анхаарч ажиллаж байна.

2021 оны нэгдүгээр улирлын байдлаар Нийслэлийн прокурорын газраас хяналт тавин ажиллаж шүүхэд шилжүүлсэн хэргүүдээс нийт есөн гэмт хэрэгт 515.112.445  төгрөгийн хөрөнгийг хурааж, улсын орлого болгохоор шүүхээр шийдвэрлүүлэв. Зарим хэргүүдээс дурдвал:

- Албан тушаалын байдлаа урвуулан ашиглаж өөртөө давуу байдал бий болгосон гэмт хэрэг үйлдсэн О.Заяамандахаас 304.040.000 төгрөг, 152.020.000 төгрөгийн үнэ бүхий 1 орон сууцыг,  

- Бусдыг дээрэмдэх, мөнгө угаах гэмт хэрэг үйлдсэн /Тагнуулын алба хаагчид бусдыг дээрэмдсэн/ Г.Доржсүрэнгээс 14.000.000 төгрөгийн үнэ бүхий нэг автомашиныг хурааж улсын орлого болгохоор шүүхээр шийдвэрлүүлэв.