Чингэлтэй дүүргийн есдүгээр хороонд иргэн Ч.Ганболдын дүү Ч.Батболдыг ажлын байран дээр нь онц хэрцгийгээр хөнөөсөн хэрэг 2015 оны нэгдүгээр сарын 3-нд гарч байсан. Гэтэл уг хэрэг өнөөг хүртэл шийдэгдээгүй бөгөөд прокурорт нийт 25 удаа шалгагдсан ч бүгд хаагдсан байна. Уг шийдвэрийг эсэргүүцсэн талийгаачийн ах Ч.Ганболд өнөөдөр мэдэгдэл хийсэн юм. Тэрбээр

“Миний дүү Ч.Батболдыг онц хэрцгий хөнөөсөн хэргийг прокурор дээр 25 удаа хэрэг үүсгэн шалгасан. Гэхдээ 25 удаа хаагдаж байна. Миний хувьд энэ хэргийг шийдэхэд нөлөөлж байгаа прокурор нарыг өөрсдийг нь алуурчин гэж бодож байна. Прокурорууд талийгаач дүүгийн минь амиа алдсан хавтаст хэргийг цаг үргэлж хуйвалдаж, дарж явдаг. Би энэ талаар худал хэлж байгаа бол шүүх хуралд ороод ялаа эдлэхэд бэлэн байна. Намайг энэ хэргийн талаар юм ярих гэхээр “Наад хэрэг чинь шалгагдаж байгаа. Хамаагүй юм ярьж байгаад өөрөө шоронд оров” гэж сүрдүүлдэг байсан. Хууль дүрэм гэж байдаг л юм бол хүн бүхэнд тэгш үйлчлэх ёстой. Прокурорууд онц хэрцгий гэмт хэрэгт хуйвалдаж, оролцсон бол, шорондоо орох хэрэгтэй. Би прокурор н.Сандагсүрэн, н.Ганчанга, Б.Уранчимэг, Д.Батболд нарыг буруутай гэж үзэж байгаа. Прокурорууд хүн хөнөөх хөнөөхдөө хууль ёсоор юм шиг хөнөөгөөд байна шүү дээ. Сүүлд шүүх эмнэлгээс шалгалт хийнэ гээд амиа алдсан дүүг минь оршуулсан байхад нь ухаж гаргасан. Дүүгийн минь онц ноцтой гэмт хэргийг зогсолтод оруулж, хуйвалдаад байгаа прокуроруудыг би шоронд хийнэ. Надад тэгэх нотлох баримт байгаа” гэв.