Өнгөрсөн мягмар гарагийн орой Баянзүрх дүүргийн 26 дугаар хороонд хөл хорио тогтоохтой зэрэгцэж, тус хорооны Засаг даргыг ажлаас нь чөлөөлсөн байна. Хөл хорио тогтоож, тусгаарлах тухай дүүргийн Засаг дарга Н.Баярмөнхийн захирамжид 26 дугаар хорооны дарга Г.Отгонбаатар биш, О.Түвшин гэж бичсэн байснаас Засаг дарга солигдсоныг мэдэж, тус хорооны оршин суугчид "Хөл хорионы үеэр Засаг даргыг халлаа" хэмээн бухимдаж, цахим сүлжээгээр дамжуулан сэтгэгдлээ илэрхийлээд буй. Үүнтэй холбоотойгоор Баянзүрх дүүргийн 26 дугаар хорооны Засаг дарга асан Г.Отгонбаатар мэдэгдэл хийлээ. Тэрбээр

“Намайг “МАН Баянзүрх дүүрэгт багаараа ажилламаар байна. Чи ажлаа өг”, “Хурдан ажлаа өг. Чамтай хамтарч ажиллаж боломжгүй”, “Захирамжийг чинь цуцалж, ажлаас чинь хална” гэдэг байсан. Сүүлд миний оронд Баянзүрх дүүргийн 26 дугаар хорооны Засаг дарга болсон О.Түвшин над дээр ирээд “Ажлаа өг” гэж хэлсэн юм. МАН бүх шатанд ялалт байгуулсан. Гэтэл одоо тэр хүмүүст хяналт тавьдаг дарга нар байхгүй болсон байна. Хорооны оршин суугчид маань намайг үргэлжлүүлж ажиллаасай гэж байгаа. Гэхдээ надад цаашид ажиллахад их хүндрэлтэй байна. Баянзүрх дүүргийн Засаг дарга Н.Баярмөнхийн гар утсанд “Хорооны Засаг даргаа авч үлдмээр байна” гэж маш олон мессеж ирсэн гэсэн. Гэтэл тэр мессежийг намайг явуулсан гээд цагдаагийн байгууллагад хандсан байна билээ. Бас намайг иргэдээ турхирч, гарын үсгийг нь цуглуулж байгаа гэж ярьж байсан. Би түүнд хамааралгүй. Өчигдөр цахим сүлжээнд ч ороогүй. Харин хорооны оршин суугчид маань өөрсдийн санаачилгаар гарын үсгээ цуглуулж байгаа юм билээ. Түүнийгээ зохих шатны хүмүүст хандаж, өргөдөл гаргах байх аа гэж бодож байна” хэмээн юм.