Насанд хүрээгүй 16-17 насны охидыг хүчээр эрхшээлдээ байлгаж, бусдад биеийг нь үнэлүүлдэг байсан таван залуугийн нэг хэмээн үзэж, 2018 оны аравдугаар сард 17-20 жилийн хорих ял авсан И.Анхбаяр, Б.Алтайбаатар нарын ээж А.Цэрэнпил өнөөдөр хоёр хүүг нь эрүүдэн шүүсэн, гүтгэсэн гэж үзэн, хорих ялыг эсэргүүцэж, Төрийн ордонг хөл нүцгэн тойров. Тэрбээр

“Монгол Улсын Үндсэн хууль, Эрүүгийн хэрэг хянан шийдвэрлэх тухай хуулийг хэрэгжүүлэхдээ хилсээр гүтгэж, эрүүдэн шүүж хоёр хүүгийн маань эрхийг ноцтой зөрчсөн. Миний хоёр хүү  хамтдаа авто засвар ажиллуулдаг байсан. 2018 оны аравдугаар сарын 18-нд  ахынхаа төрсөн өдрийг тэмдэглэхээр гэрээсээ гарсан хоёр хүүтэй минь Г.Идэрбат уулзсан. Улмаар И.Анхбаяр, Б.Алтайбаатар  нар нь хороололд хоол идээд байж байтал гаднаас тусгай хүчнийхэн орж ирээд барьж хэрэг хүлээлгэсэн. Өмгөөлөгчгүйгээр байцаалт авсан. 2020 оны тавдугаар сарын 7-нд гэм буруугийн шүүх хурал товлогдоод 17-20 жилийн хорих ял оноосон" гэв.

       Хоёр хүүд нь хорих ял оноосон тухайн үед цагдаагийн байгууллагаас “Дээрх 24-29 насны таван залуу нь охидтой дотно танилцан, улмаар зургийг нь интернэтээр цацна, цагдаад мэдэгдэнэ, аав, ээжид чинь хэлнэ гэр зэргээр айлган сүрдүүлж, өөрсдийн түрээсэлж буй байрандаа хорьдог байсан” хэмээн мэдээлж байжээ.

Харин иргэн А.Цэрэнпил өөрийн хоёр хүү болох И.Анхбаяр, Б.Алтайбаатар нарыг 48 цагийн турш дөрвөн цагдаа тасралтгүй зодож, эрүүдэн шүүсэн. Мөн дээрх хэрэгт холбогдсон Г.Идэрбат, н.Хатарбаатар хоёрыг хэргээс мултлахын тулд өөрийнх нь хоёр хүүд хэрэг хүлээлгэсэн гэж үзэн Хууль зүй, дотоод хэргийн сайд Х.Нямбаатарт хандан хоёр хүүгээ батлан даалтад гаргаж өгөхийг хүссэн байна.