Хүйтний улиралд ОБЕГ-т хандах аюул, ослын дуудлагын ихэнх хувийг ахуйн гал түймрийн дуудлага эзэлжээ. Он гарснаас хойш улсын хэмжээнд гал түймрийн нийт 461 тохиолдол бүртгэгдэж, ОБЕГ-ын алба хаагчид 90 иргэний амь насыг аварч, 15 хүн галт түймрийн улмаас амиа алдсан байна.

      Галын шалтгаан нөхцөлийг авч үзвэл, пийшин зуухны бүрэн бүтэн байдлыг хангаагүй, цахилгааны утас, цахилгаан хэрэгслийн хэт ачаалал үүсгэх, бага насны хүүхдүүдээ хараа хяналтгүй гэрт нь цоожилж үлдээх зэргээр галын аюулгүй байдлын дүрэм журмыг баримтлаагүй, иргэдийн санамсар болгоомжгүй байдлаас үүдэн гал гарсан байна.

     Тухайлбал, өнөө өглөөний 10:37 цагт Нийслэлийн Сонгинохайрхан дүүргийн 22 дугаар хороо Тахилтын гуравдугаар гудамжинд гэр шатаж байна гэх дуудлага ОБЕГ-т иржээ. Дуудлагын дагуу НОБГ-ын Сонгинохайрхан дүүргийн Онцгой байдлын хэлтсийн Гал түймэр унтраах, аврах 26 дугаар ангийн 11 алба хаагчид очиход залгаж барьсан хоёр монгол гэр шатаж, галд 5-13 насны гурван хүүхэд өртөж нас барсан харамсалтай хэрэг гарсан бөгөөд гал гарсан шалтгааныг тогтоохоор ОБЕГ-аас үргэлжлүүлэн шалгалтын ажиллагаа явуулж байгаа юм.

 Иргэд болзошгүй гал түймрийн аюулаас өөрийгөө хамгаалахын тулд дараах шаардлагыг хангах хэрэгтэй. Үүнд:

– Гэртээ зул, хүж асаахдаа галын аюулгүй байдлыг хангаж, хяналтгүй орхихгүй байх,

– Шингэрүүлсэн шатдаг хийгээр ажилладаг тулга, зуухыг ашиглахдаа аюулгүй ажиллагааны дүрэм журмыг баримтлан анхаарал болгоомжтой байх(шаардлагатай тохиолдолд мэргэжлийн байгууллагаас зөвлөгөө авах),

– Цахилгаан ашиглалтын дүрэм журмыг сайтар мөрдөж, эвдрэл гэмтэлтэй, зориулалтын бус цахилгаан хэрэгсэл ашиглахгүй байх,

– Гарааш, ил зогсоолд автомашинаа байрлуулахдаа галын аюулгүйн зай хэмжээг баримтлан хэт шахаж байрлуулахгүй байх,

–  Байр орон сууцны орчимд шуурхай албаны автомашин бөглөхгүй байх,

– Цахилгаан хэрэгслийг хүчдэлээс салгаж орхих,

– Бага насны хүүхдийг харж асрах хүнгүйгээр гэрт нь цоожилж орхихгүй байхыг ОБЕГ-аас анхааруулж байна.