Тээврийн цагдаагийн албаны жижүүрийн шуурхай удирдлагын хэлтэс өнгөрсөн амралтын өдрүүдэд нийт 366 дуудлага, мэдээлэл хүлээн авснаас зам тээврийн ослын шинжтэй 251 дуудлага мэдээллийг хүлээн авч, шийдвэрлэж ажилласан байна. Тухайлбал, бүртгэгдсэн зам тээврийн ослын улмаас хоёр явган зорчигч гэмтэж, ноцтой зам тээврийн ослын улмаас орон нутагт хоёр хүн амиа алджээ. Хүний амь нас хохирсон ноцтой зам тээврийн ослын талаар тодруулбал:

-Хоёрдугаар сарын 7-ны  буюу өчигдрийн 17:30 цаг орчимд Баян-Өлгий аймгийн Буянт сум гуравдугаар баг, сумын төвөөс зүүн хойш 45 км зайд байрлах Урамт гэх газар шороон замд улсын дугааргүй "Хурд" маркийн мотоцикл "Тоёота Королла" маркийн автомашинтай мөргөлдөж, жолооч 29 настай, эрэгтэй Х амиа алдсан.

-Хоёрдугаар сарын 6-ны өдөр буюу өнгөрсөн бямба гарагийн 21:00 цагийн орчимд Баян-Өлгий аймаг Толбо сум зургадугаар баг, сумын төвөөс баруун тийш 15 км зайд байрлах Бураат гэх газар шороон замд "Нордбенз" маркийн хүнд даацын ачааны автомашин онхолдож, жолооч 27 настай, эрэгтэй Э амиа алджээ.

         Мөн алба хаагчдын хяналт шалгалтын үеэр согтуугаар тээврийн хэрэгсэл жолоодсон нийт 94  жолоочийг илрүүлснээс 68 нь нийслэлд, 26 нь орон нутгийнх бөгөөд хуулийн дагуу хариуцлага тооцжээ. 

           Орон нутгийн замын хөдөлгөөнд оролцохдоо зам, орчны нөхцөл байдалд хурдаа тохируулж зорчихыг Тээврийн цагдаагийн байгууллагаас анхааруулж байна.