ЦАХИЛГААН МЕНИНГИТЭЭС ХЭРХЭН УРЬДЧИЛАН СЭРГИЙЛЭХ ВЭ?

Налайх дүүрэгт менингитийн халдвар бүртгэгдэж, нэн хүнд явцтай Менингококкцеми үжил, үжлийн шок, олон эрхтний дутагдал оноштой эмчлэгдэж байсан бага насны хүүхэд эндсэн харамсалтай тохиолдол гарсан. Сүүлийн үед менингококкт халдварын тохиолдол нэмэгдэх хандлагатай байгаа тул Эрүүл мэндийн яамнаас иргэдэд урьдчилан сэргийлэх арга хэмжээг сайтар мөрдөхийг зөвлөж байна. Иймд энэ өвчний халдвар, шинж тэмдэг, түүнээс урьдчилан сэргийлэх аргуудын талаар зөвлөмж хүргэж байна.

Мэнингококк нянгаар үүсдэг халдвар бөгөөд тархины бүрхүүл, нугасны үрэвсэл (менингит), цусны халдвар (сепсис) үүсгэж болзошгүй аюултай өвчин юм. Хамгийн эрсдэлтэйн  уг өвчин халдварт агаар дуслын замаар дамжиж, богино хугацаанд хүндэрч болдог.

 Хэрхэн халдварлах вэ?

Менингококкт халдвараар өвдсөн хүн, нян тээгчээс агаар дуслын замаар халдвар дамжих ба үүсгэгч нян нь хүний хамар, залгиурт байршиж өвчин үүсгэнэ. Нууц үеийн хугацаа нь 3-10 хоног, дунджаар 5-7 хоног байдаг.

Бүх насны хүн өвчлөх боловч 5 хүртэлх насны хүүхэд илүү өртөмтгий байдаг.

Ямар шинж тэмдэг илэрвэл яаралтай эмчид хандах вэ?

• Гэнэт 38-39 хэм ба түүнээс дээш өндөр халуурах
• Биеээр цусархаг тууралт гарах
• Толгой, үе мөчөөр хүчтэй өвдөх
• Олон удаа бөөлжих
• Хоолонд дургүй болох, ядарч сульдах
• Татах
• Биед нь хүрэх, чанга дуу чимээ, хурц гэрэл зэрэгт цочрох
• 1 хүртэлх насны хүүхдэд зулай түмбийж чинэрэх

Урьдчилан сэргийлэх аргууд:

• Вакцин хийлгэх-Менингококкт халдвараас хамгаалах хамгийн үр дүнтэй арга нь вакцин юм. Ялангуяа бага насны хүүхэд, өсвөр насныхан, олон хүнтэй харилцдаг хүмүүс (оюутнууд, цэргүүд) заавал хийлгэх нь чухал.
• Гараа тогтмол угаах -Савантай усаар гараа угааж, амны хаалт зүүх.
• Олон хүнтэй газраар явахаас зайлсхийх-Халдварын дэгдэлт гарсан үед олон нийтийн газраар явахгүй байх.
• Өрөөг тогтмол агааржуулах-Агаарын солилцоо сайн байх нь халдварын эрсдэлийг бууруулна.
• Гэр, ахуйн орчинд ариутгал хийх-Ариутгагч бодисын нөлөөгөөр 1-2 минутын дотор нян устдаг.
• Дархлаагаа дэмжих-Эрүүл хооллолт, хангалттай унтаж амрах, тогтмол дасгал хөдөлгөөн хийх нь дархлааг сайжруулна.

Уг өвчнийг эрт оношлож, зохих эмчилгээ хийсэн тохиолдолд хүндрэлээс сэргийлэх боломжтой тул халдварын шинж тэмдэг илэрсэн тохиолдолд яаралтай эмчид хандахыг ЭМЯ-наас зөвлөж байна. 

Х.Анар