Хүүхдийн төлөө фондын үйл ажиллагааг сэргээсэнтэй холбогдуулан Монгол Улсын Ерөнхийлөгчийн санаачилгаар өнгөрсөн арванхоёрдугаар сарын 30-нд тус фондод хуримтлал үүсгэх “Монгол соёл-Монгол хүүхэд” цахим тоглолт зохион байгуулсан. Харин уг тоглолтын үеэр хандивлахаар амласан цахим мөнгө болох 6556 onecoin зоос буюу нэг тэрбум төгрөгтэй тэнцэх хандивыг Монгол Улсын одоогийн хууль тогтоомжийн хүрээнд хүлээн авч, бүртгэн, зарцуулах эрх зүйн орчин байхгүй тул дээрх хандивыг хүлээн авах боломжгүй, мөн цаашид ч энэ хэлбэрийн хандивыг хүлээн авахгүй хэмээн Хүүхдийн төлөө фондоос мэдэгдлээ.

       Засгийн газар өнгөрсөн оны арванхоёрдугаар сарын 30-ны өдөр хүүхдийн төлөө фонд байгуулж, тус фондод хуримтлуулах 10 тэрбум төгрөгийн эх үүсвэрийг шийдвэрлэсэн. Тус сангийн хөрөнгийг “Хүүхдийн номын сан, Хүүхдийн театр, Хүүхэд, залуучуудын соёл спортын цогцолбор зэрэг хүүхэд залуучуудын хөгжлийг дэмжих байгууллагуудыг шинээр барихад зарцуулна” хэмээн мэдээлсэн билээ.