Өнгөрсөн мягмар гарагт Хөвсгөл аймгийн Ханх суманд 6.5 магнитудын хүчтэй газар хөдөлсөнтэй холбогдуулан тус аймгийн Улсын тусгай хамгаалалттай газрын хамгаалалтын захиргаанаас Хөвсгөл нуур орчимд хяналт, шалгалт хийсэн байна. Энэ хүрээнд Хөвсгөл нуурын баруун эрэг дэх Хатгал тосгоноос 80 км, Ханх сумаас 160 км орчимд Жиглэгийн амнаас Модон хүй арлын ойролцоо дрон нисгэж, шалгахад, нуурын баруун эргийн мөсний зузаан 80-85 см байжээ. Харин зүүн эргийн Загастай хүртэл ажиглалт хийхэд Алагцарын голын аман хэсгийн мөсөнд 20-40 см зуузан цууралт үүсэж, орзон ихтэй хөлдсөн болохыг тогтоосон аж. Мөн газар хөдлөлтийн нөлөөгөөр Эгийн голны гүүрний дээд хэсгээр их хэмжээний ус түрж, халиа үүсгэн хөлдөж, гүүр рүү мөс түрэгдсэн байжээ.

        Иймд Улсын тусгай хамгаалалттай газрын хамгаалалтын захиргаанаас Хөвсгөл нуур болон Алагцарын гүүр орчимд зорчиж буй иргэдийг анхаарал, болгоомжтой зорчихыг сануулав.