Төв аймгийн Онцгой байдлын газрын нарийн бичгийн дарга, хошууч Г.Ганхөлөг цаг үеийн талаарх шуурхай мэдээллийн үеэр "Улаанбаатар хотоос ирж, гэрийн ажиглалтад байгаа иргэд 14 хоногийн тусгаарлалтын дүрэм зөрчиж буй бөгөөд гадуур гарч, сэлгүүцэх тохиолдол илэрсэн. Тиймээс Гамшгаас хамгаалах тухай хуулийн 5.13 дугаар зүйлийн хоёр буюу халдварт өвчний үед эрх бүхий байгууллагаас тогтоосон хорио цээр, хөдөлгөөний хязгаарлалт, тэдгээрийн дэглэм зөрчсөн, эсхүл саад учруулсан нь эрүүгийн хариуцлага хүлээлгэхээргүй бол хүнийг таван зуун нэгжтэй тэнцэх хэмжээний төгрөгөөр торгох торгуулийн арга хэмжээ авна" хэмээсэн юм. УОК-ын шийдвэрийн дагуу Улаанбаатар хотод хөл хорионд орж, гацсан орон нутгийн иргэдийг нутаг буцаах ажлыг зохион байгуулаад байна. Орон нутгийн иргэдийг нутаг буцаах ажлын хүрээнд энэ сарын нэгнээс зургааны хооронд Улаанбаатараас Төв аймгийн 27 суманд нийт 2965 иргэн зорчсон талаар аймгийн Онцгой комиссын шуурхай штабаас мэдээлсэн билээ.

       Нутагтаа эргэн ирсэн иргэдийг тээвэрлэсэн тээврийн хэрэгсэл, ачааг ариутган халдваргүйжүүлж, иргэдийг “Гэрийн тусгаарлалт, ажиглалтад байгаа иргэдийн хяналтыг зохицуулах түр журам”-д заасны дагуу гэр гэрт нь тусгаарлан ажиглахаар шилжүүлж байгаа талаар аймгийн Эрүүл мэндийн газрын дарга С.Мөнхтуяа мэдээллээ. Иймд 14 хоногийн гэрийн тусгаарлалтад байгаа иргэдийг иргэний үүргээ биелүүлэхийн албаныхан анхааруулж байна.