Нийслэлийн Сонгинохайрхан дүүргийн Баруун салаа орчмын гэр хорооллоос нярайн цогцос олдсон. Тодруулбал, өнгөрсөн лхагва гарагт цагдаагийн байгууллагад “Баруун салаа орчмын гэр хорооллын гудамжинд өлгийтэй хүүхэд байна” гэх дуудлага ирсэн аж. Дуудлагын дагуу цагдаагийн алба хаагчид тухайн газарт очиход 51 см эрэгтэй хүүхдийн цогцос хаясан байсныг олж, шалгалтын ажиллагаа явуулсан. Тэгвэл нярай хүүхдээ хаясан эхийг олсон гэх мэдээллийн дагуу ЦЕГ-ын Хэвлэл мэдээллийн төвийн дарга, дэд хурандаа Б.Баатархүүтэй холбогдож, тодруулсан юм. Тэрбээр

“Нярайн хүүхдээ хаясан эхийг өчигдөр орой эрэн сурвалжилж олсон. Одоогоор Сонгинохайрхан дүүргийн цагдаагийн II хэлтсээс шалгалтын ажиллагаа явуулж байгаа. Дэлгэрэнгүй мэдээлэл өгөх боломжгүй” гэв.

Албан бус эх сурвалжийн мэдээлснээр хаягдсан хүүгийн эх 22 настай М нь нэгэн үйлчилгээний байгууллагад зөөгчөөр ажилладаг. Тэрбээр энэ сарын 7-ны өдөр Өргөө амаржих газарт эрүүл саруул, 51 см өндөр, 2.6 кг хүү төрүүлсэн. Гэвч эмнэлэгт нэг хоноод гарсан байна. Тэгэхдээ Сонгинохайрхан дүүрэгт байрлах Баруун салаа орчимд нярай хүүхдээ хээр хаяад явсан аж. Улмаар нярай хүүгийн цогцсыг гурван хоногийн дараа  ойролцоох айлын оршин суугчид олж цагдаагийн байгууллагад мэдээлжээ.