Архангай аймгийн Чулуут суманд кино зураг авахаар очсон нэг хүнээс коронавирусийн халдвар илэрсэн. Улмаар коронавирусийн халдвар авсан кино зураг авалтын гишүүн болон түүний ойрын 15 хүнийг тус сумаас ХӨСҮТ рүү зөөвөрлөж, тусгаарлаад байгаа билээ. Харин тус сумын орох, гарах хөдөлгөөнийг хязгаарлаж, сум даяар хөл хорио тогтоосон гэх мэдээлэл бий. Бид үүнтэй холбогдуулан Архангай аймгийн Чулуут сумын ЗДТГ-ын Бичиг хэргийн ажилтан Б.Мягмаржаргалаас тодруулахад

“Энэ сарын 6-ны оройноос эхлэн тодорхойгүй хугацаагаар хөл хорио тогтоосон. Коронавирусийн халдвар авсан хүний хавьтал болсон 14 хүн бий. Тухайн хүмүүсийг орон нутгийн дэн буудалд тусгаарлаж байгаа. Дэн буудал нь хөдөөний айл болохоор хоол, хүнсний зүйлийг дотроосоо зохицуулж байгаа. Харин гаднаас оруулах шаардлагатай зүйлийн хүсэлт гаргаагүй. Өнөөдөр давтан шинжилгээг авч, ХӨСҮТ рүү явуулсан. Хариу нь маргааш гэхэд гарах байх. Одоогоор коронавирусийн шинж тэмдэг илэрсэн хүн байхгүй” гэв.