Ард кино театрт байрлах “Circle K” салбар дэлгүүрийн угаалгын өрөөний хогийн савнаас өнгөрсөн оны аравдугаар сарын 1-ний өдөр дутуу төрсөн нярай олдсон талаар бид мэдээлсэн билээ. Тухайн үед дэлгүүрээр үйлчлүүлж, худалдан авалт хийсэн эмэгтэй дутуу төрсөн хүүхдээ цамцандаа боож, хогийн саванд хийсэн талаар цагдаагийн байгууллагаас мэдээлж байв.

     Нярайн биеийн байдал хүнд байсаар ЭХЭМҮТ-ийн сэхээн амьдруулах тасагт өнгөрсөн оны арваннэгдүгээр сарын 4-ний 02:00 цагт нас барсан юм.

    Тэгвэл “Circle K” салбар дэлгүүрийн хогийн саванд нярай хүүхдээ хаясан эмэгтэйг Чингэлтэй дүүргийн цагдаагийн нэгдүгээр хэлтэст шалгаж, 18 жилийн хорих ял төлөвлөсөн тухай мэдээлэл цахим орчинд гарсан. Бид энэ талаар Улсын ерөнхий прокурорын газраас тодруулахад,

“Нярай хүүхдээ дэлгүүрийн хогийн саванд хаясан эмэгтэйн хэргийг шалгаж дуусаагүй. Цагдаагийн байгууллагаас шалгалтыг ажиллагааг үргэлжлүүлж байгаа” гэх тайлбарыг өглөө.