Арабын Нэгдсэн Эмират Улсын нийслэл Дубай хотод “PUBG mobile” видео тоглоомын дэлхийн аварга шалгаруулах тэмцээн болсон. Тус тэмцээнд манай орны “ZEUS” баг амжилттай оролцон, хүрэл медаль хүртэж, 100 мянган ам.долларын шагнал хүртсэн билээ.

      Үүнтэй холбоотойгоор “ZEUS” баг шагналын сангийн 40 хувийг Татварын ерөнхий газарт тушаах тухай мэдээлэл цахим сүлжээгээр тархсан. Харин Татварын ерөнхий газраас уг мэдээллийг ташаа болохыг зарлаж, “ZEUS” багийнхан Хувь хүний орлогын албан татварын тухай хуульд зааснаар нийт орлогынхоо таван хувийг тушаах хуулийн зохицуулалттайг дурдсан юм. Гэвч олон нийт үүнд бухимдалтай хандаж буй. Иймээс Татварын ерөнхий газрын Татварын удирдлага, хамтын ажиллагааны газрын ахлах байцаагч Б.Галбадрахаас зарим зүйлийг тодрууллаа.

-“PUBG mobile” видео тоглоомын дэлхийн аварга шалгаруулах тэмцээнд гуравдугаар байрт шалгарсан “ZEUS” багийнхан орлогынхоо таван хувийг татварт төлнө, төлөхгүй гэх маргаан нийгэмд гараад буй. Та энэ талаар дэлгэрэнгүй мэдээлэл өгөхгүй юү?

-Энэ бол хүүхдүүдийг анх удаа тэмцээнд орж, амжилт үзүүлэхээр нь татвар авах гээд дайраад байгаа асуудал биш. Урьд өмнө нь хэрэгжиж байсан хууль. Хувь хүний албан татварын тухай хуулиар соёл урлаг, спортын тэмцээн, наадмуудад оролцож, амжилт үзүүлсэн иргэдийн шагналын нийт дүнгээс таван хувийн татвар ногдуулж авдаг. Гаднын тэмцээн, уралдаанд оролцоод ирсэн хүмүүсийн шагналын мөнгөнөөс нь таван хувиа суутгаж, орлогыг нь өгдөг. Тиймээс энэ хууль, тогтоомж гэнэт гарч ирсэн зүйл биш. Хүүхэд, залуус мэдээлэлгүй байсан учраас цочмог, бухимдалтай хандаж байх шиг байна.

-“ZEUS” багийн “PUBG mobile” видео тоглоомын дэлхийн аваргын тэмцээнд оролцох зардлыг цаад зохион байгуулагч орноос нь гаргасан юм билээ. Хэдий улсаас тэднийг тэмцээнд оролцоход тусалж, санхүүгийн дэмжлэг гаргаагүй байсан ч татвараа заавал төлөх ёстой гэсэн үг үү?

-Хувь хүний орлогын албан татварын тухай хуульд зааснаар тухайн иргэнээс авах татварын хувийг нийт шагналынх нь хэмжээгээр тодорхойлж, орлогын дүнгээс нь таван хувийг авдаг. Татвар бол үндсэн хуулиар баталгаажсан иргэний үүрэг. Хуулиар зохицуулсан албан татварыг бүхий л иргэн төлөх  үүрэгтэй. Тухайн хуулийг УИХ-аас баталж, тогтмол ёсоор дагаж, хэрэгжүүлдэг. Тийм ч учраас хуулийнхаа дагуу л явах ёстой. Мэдээж тухайн баг, тамирчид Монгол Улсынхаа нэрийг дэлхийн тавцанд гаргасанд монголчууд бүгдээрээ баяртай байна. Гэвч орлого олсон иргэн тухай бүрдээ өөрийн орлогоо тодорхойлж, татвараа төлөх  үүрэгтэй. Үйл ажиллагааны орлого 10 хувь, бооцоот тэмцээний орлого 40 хувь гэх зэргээр орлогын төрлөөсөө хамаарч төлөх татварын хувь, хэмжээ харьцангуй байдаг юм.

-Тэгэхээр ерөнхий боловсролын сургуулийн сурагчид ч мөн адил гаднын тэмцээнд өөрсдийн зардлаар явж, оролцчихоод татвар төлөх хэрэгтэй болох нь ээ?

-Татварын ерөнхий газарт татвар төлөгчөөр бүртгүүлж байж л явах ёстой л доо. Зарим талаараа “ZEUS” багийн дэмжигчид зөв ойлгох хэрэгтэй. Татварын ерөнхий газраас тухайн багийг е-спортын баг хэмээн бүртгэж, татвар төлөгч болгосон. Одоогийн нөхцөлд “ZEUS” багийн хүүхдүүд үнэн хэрэгтээ хэдэн төгрөг авсныг  бид мэдэхгүй шүү дээ. Тус багийнхны хувьд эх орондоо ирмэгцээ өөрсдийн орлогоо нэгдсэн хэмжээгээр тодорхойлж, түүнийхээ таван хувийг нь татварт төлөх ёстой.

-Хэрэв татвар төлөхөөс зайлсхийвэл ямар хариуцлага тооцох вэ?

-Энэ талаар ярьмааргүй байна. Хэрэв ярих юм бол “ZEUS” багийн дэмжигчид “Шагналаа ч аваагүй байхад нь татвар авах, бүр торгох юм байна” гэсэн буруу ойлголт авах болно шүү дээ.