Монгол Улсын Засгийн газар, УОК ээлжит хуралдаанаа өчигдөр буюу зургадугаар сарын 24-ний өдөр зохион байгуулсан. Уг хуралдаанаар ресторан, хоолны газруудыг заалаар үйлчлэхийг хориглох шийдвэрээ 10 хоногийн хугацаатай сунгасан.

Тэгвэл өнөөдөр нэр бүхий хоол үйлдвэрлэгчид дээрх шийдвэрийг эсэргүүцэж, үйл ажиллагаагаа хэвийн үргэлжлүүлэхээ мэдэгдэв. Үүнтэй холбоотойгоор МХЕГ-ын Хэвлэлийн төлөөлөгч Т.Балжиннямаас тодрууллаа. Тэрбээр

“Энэ тохиолдолд зөрчлийн тухай хуульд заасны дагуу торгох, баривчлах, байгууллагын үйл ажиллагааг нь түр хаах хүртэл арга хэмжээ авна” гэсэн юм.

Зөрчлийн тухай хуулийн 5.13.2 дугаар хэсэгт “Гамшиг, аюулт үзэгдэл, халдварт өвчин, осол, аюулын үед эрх бүхий байгууллагаас тогтоосон хорио цээр, хөдөлгөөний хязгаарлалт, тэдгээрийн  дэглэм зөрчсөн, эсхүл саад учруулсан нь эрүүгийн хариуцлага хүлээлгэхээргүй бол хүнийг таван зуун нэгжтэй тэнцэх хэмжээний төгрөгөөр торгох, эсхүл долоогоос гуч хоногийн хугацаагаар баривчлах шийтгэл оногдуулах, хуулийн этгээдийг таван мянган нэгжтэй тэнцэх хэмжээний төгрөгөөр торгоно” гэж заасан байна.

Тухайлбал “Мисо рамен” ресторан мэдэгдэлдээ “Ажилчид маань ардаа амьдралтай, үр хүүхэдтэй Монгол Улсын иргэд. Тодорхой үр дүнгүй удаан хугацааны хорионы улмаас тэд маань амьдралаа авч явахад улам хэцүү болж байна. Сүүлийн үед халдварын тоо ихэссэн нь хоолны газраас боллоо гэж үзэн хязгаарлалт тогтоож байгаа нь оновчгүй байна.

Сонгууль зохион байгуулж, одон гардуулж, найр наадам болгож олон хүний бөөгнөрөл үүсгэн халдвар ихэсгэсэн нь төр засаг. Гэтэл төр засаг яагаад хариуцлага хүлээхгүй байгаа юм бэ. Халдварын тархалтыг зогсоохын тулд төр засаг манлайлан хүний бөөгнөрөл үүсгэх ажлуудаа зогсоох ёстой биш үү.

Иймээс төр засгийн хариуцлагагүй үйлдлийн хариуцлагыг бид үүрмээргүй байна. Үр дүнгүй хорио, хязгаарлалтууд бидний аж амьдрал, эдийн засгийг сэргээхгүй гэж үзэж байна. Тиймээс өнөөдрөөс үйл ажиллагаагаа хэвийн үргэлжлүүлж заалаар үйлчилж эхэлнэ гэдгээ УОК-т үүгээр мэдэгдэж байна” гэсэн юм.