УДЭТ-ын үзвэртэй холбоотойгоор өнгөрсөн 24 цагийн хугацаанд тус театрын 54 ажилтнаас коронавирусийн халдвар илэрсэн. Улмаар ХӨСҮТ-ийн Хэвлэлийн зөвлөх Б.Ууганбаяр соёл урлаг, үзвэр үйлчилгээний байгууллагуудыг тоглолтуудаа цуцлахыг уриалаад байлаа. Харин энэ үеэр УДЭТ-аас ил захидал гаргаж, олон нийтэд дэлгэсэн юм. Уншигч та бүхэнд УДЭТ-ын ил захидлыг бүрэн эхээр нь хүргэж байна.

Эрхэм үзэгч танаа

Домогт Бөмбөгөр ногоон театрын Алтан үеийн аварга жүжигчид, найруулагчдын та бидэнд өвлүүлж өгсөн УДЭТ-ын түүхт 90 жилийн ой өнөө жил тохиож байгаа билээ. Театр үзэгчгүй бол юу ч биш, хоосон байшин. Тайзнаа үзэгчид жүжигчдийн амьд харилцаа байсан цагт театр амьд байдаг. Нэг ёсондоо театрын эзэн нь үзэгч та юм шүү дээ. Нийтийн сүлжээгээр театрыг гутаасан, уран бүтээлчдийн сэтгэлийг сэвтээсэн мэдээлэл гарч буйд бид сэтгэл эмзэглэж сууна. Гайт коронавирусыг биендээ халдааж театртаа, бусдад тараахыг хэн хүсэх билээ. Өвчин гэдэг хэлж ирдэггүй хийсэж ирдэг шүү дээ. Уран бүтээлчид эмзэг, элгэн халуун сэтгэлтэй хүмүүс байдаг. Бид үзэгчид та нартайгаа уулзах гэж хэчнээн их хүсэж тэмүүлсэн билээ. Та нарынхаа алга ташилт, хүндлэлээс бид амьдрах, бүтээх урам зориг авч байдаг юм. УОК, Соёлын яамнаас гаргасан дүрэм журмыг хэрэгжүүлэн, НМХГ-аас өгсөн шаардлагад нийцүүлэн хорио цээрийн дэглэмийг хүн бүр чадлынхаа хэрээр чандлан сахиж, театрынхаа булан тохой бүрийг ариутгаж, халдвараас урьдчилан сэргийлэх хаалгыг үзвэрийн болон ажиллагсдын хэсэгт суурилуулж, үзэгчдийнхээ аюул эрсдэлгүй, тав тухтай нөхцөлийг хангахын төлөө эрвийх дэрвийхээрээ зүтгэсэн билээ.

Манай театр гуравдугаар сарын 1-нд хууль журмын дагуу бүх ажиллагсдын “Нэг өрх-Нэг иргэн” шинжилгээний албан ёсны сөрөг хариуг үндэслэн үйл ажиллагаагаа эхлүүлж “Анна Каренина” жүжгийн сургуулилтад орж, түр журмын дагуу суудлын 50 хүртэлх хувийн дүүргэлттэй тус жүжгийн тоглолтыг гуравдугаар сарын 4 (196 хүн), 5 (236 хүн), 6 (247 хүн)-ний өдрүүдэд хийж, 679 хүнд үйлчилсэн юм. Үзэгч түмнээсээ уучлалт гуйхын ялдамд мэргэжлийн байгууллагуудаас гаргасан шийдвэрийн дагуу гуравдугаар сарын 04,05-нд жүжиг үзсэн хүмүүс 03 дугаар сарын 09-нд 09:00-17:00 цагт, 03-р сарын 06-нд жүжиг үзсэн хүмүүс гуравдугаар сарын 10-нд 09:00-17:00 цагт УДЭТ-т ирж, шинжилгээндээ бүрэн хамрагдахыг уриалж, нэг ч хүнээс халдвар битгий илрээсэй гэж залбирч байна. Бид вирус халдварыг биенээсээ, театраасаа шүүрдэн зайлуулж, хогийн тантанд үүрд булшлан эрхэм үзэгчидтэйгээ халуун дотно сэтгэлээр уулзах тэр цаг ойрхон гэдэгт итгэж байна.

Мөн гуравдугаар сарын 07-14-ны өдрүүдийн тоглолтын тасалбарыг УДЭТ-ын касснаас худалдан авсан бол (99250387) дугаараар холбогдох, www.ticket.mn сайтаас худалдан авсан бол (90101800, 1900-1800) дугаарт холбогдож ямар нэгэн шимтгэлгүйгээр 100 хувь буцаан авах боломжтой.

УЛСЫН ДРАМЫН ЭРДМИЙН ТЕАТР