Мэргэжлийн холимог тулааны спортын UFC холбооны “UFC-261”-ийн тоглолтууд өнөөдөр явагдлаа.

Тус тоглолтод өдгөө 31 настай Монгол Улсын холимог тулааны спортын шилдэг тулаанчдын нэг болох Д.Батгэрэл UFC холбооны албан ёсны гурав дахь тулаанаа хийж, АНУ-ын 27 настай тулаанч Кевин Нативидадтай тулалдсан юм.

Тэрбээр өрсөлдөгчөө 50 секундын дотор хүнд цохилтоор буулгаж аван UFC холбооны үзэгчдэд өөрийгөө таниулсан аж.

Уг тулааныхаа дараа Д.Батгэрэл АНУ-ын 26 настай холимог тулаанч Шон О’Мэйлийг тулаанд дууджээ.

Шон О’Мэйли нь мэргэжлийн холимог тулааны дэвжээн дээр нийт 14 тулаан хийж, 13-т нь ялалт байгуулахдаа есөд нь хүнд цохилтоор өрсөлдөгчөө буулган авч, мэргэжлийн спортын дэвжээнд ганц удаа ялагдал хүлээсэн шилдэг тулаанчдын нэг юм.