Олон улсын чөлөөт бөхийн холбооноос Казахстан Улсын Алматы хотод зохион байгуулж буй "Алматы-2021" чөлөөт бөхийн Азийн аварга шалгаруулах тэмцээний сүүлийн өдөр эрэгтэйчүүдийн 61, 74, 84, 92, 125 кг жингийн барилдаанууд явагдаж, манай тамирчид нэг мөнгө, хоёр хүрэл медаль хүртлээ.

74 кг жинд 2014 оны өсвөр үеийн ДАШТ болон Азийн аваргад үзүүрлэсэн “Хангарьд” спорт клубын тамирчин, ОУХМ З.Сумъяабазар эхний хүрэл медалийг авчирсан юм. Тэрбээр шөвгийн наймд дэлхийн аварга Япон Улсын тамирчин, өсвөр үеийн ДАШТ-ий хошой хүрэл медальт Кейсүкэ Отогүрог 4:2-оор ялсан ч хагас шигшээд 2019 оны ДАШТ-ий мөнгөн медальт, Азийн аварга, Казахстан Улсын тамирчин Нуркожа Кайпановт 2:4-өөр ялагдсан. Гэвч хүрэл медалийн төлөө Кыргызстаны Мансур Сиргак Уулуг 4:1-ээр ялж, шагналын тавцанд гарсан байна.

Харин 23 хүртэлх нас, насанд хүрэгчдийн Азийн АШТ-ий хүрэл медальт, “Хангарьд” спорт хорооны тамирчин, ОУХМ М.Цогтгэрэл өнгөрсөн жилийн медалийн өнгөө ахиулжээ. Тэрбээр шөвгийн наймд БНСУ-ын Гвон Хек Бумыг цэвэр, хагас шигшээд өсвөр үеийн дэлхийн аварга, залуучуудын Азийн аварга Казахстаны Эльхан Ассадовыг 7:2-оор тус тус ялж шигшээд шалгарсан. Гэвч алтан медалийн төлөөх барилдаанд 23 хүртэлх насны дэлхийн хошой аварга, Иран Улсын тамирчин Камран Гасемпурт цэвэр оноогоор (0:10) ялагджээ.

Мөн энэ өдөр чөлөөт бөхийн ОУХМ Д.Хүдэрбулга 125 кг жинд Узбекистаны Амиржон Нутфуллаевыг (10:0) цэвэр ялснаар “Алматы-2021”-ийн дэвжээнд Монгол Улсын чөлөөт бөхийн эрэгтэй тамирчдын хоёр дахь хүрэл, гурав дахь медалийг авчирсан юм. Мөн уг тэмцээнээс хүртсэн хүрэл медаль нь Д.Хүдэрбулгын Азийн аваргаас хүртсэн зургаа дахь медаль болж байна. Тэрбээр өмнө нь Ази тивийн 2014 онд алт, 2020 онд мөнгө, 2012, 2013, 2016 онуудад хүрэл медаль хүртэж байжээ