Олон улсын ширээний теннисний холбооноос 2020 оны гуравдугаар сарын 19-нд Кавар Улсын Доха хотод зохион байгуулсан олимпын эрх олгох сүүлчийн тэмцээнд Монгол Улсын шигшээ багийн тамирчин Э.Лхагвасүрэн, Б.Болор-Эрдэнэ нар оролцсон.

Тэгвэл саяхан Э.Лхагвасүрэн, Б.Болор-Эрдэнэ нарт Япон Улсын нийслэл Токио хотод зохион байгуулагдах “Токио-2020” зуны олимпын XXXII наадамд оролцох эрхийн батламжийг илгээжээ.

Манай ширээний теннисчид анх 1961 онд ДАШТ-д оролцож байсан бөгөөд Монголын ширээний теннисний 65 жилийн түүхэндээ анх удаа олимпын наадамд оролцох эрх авч, түүх бүтээгээд байгаа юм.

“Насанд хүрэгчдийн үндэсний шигшээ баг бүрдүүлэх журам”-ын дагуу ширээний теннисний спорт нь Монгол Улсын Үндэсний шигшээ багийн төрөлд өнгөрсөн оноос эхэлж албан ёсоор бүртгэгдсэн.

Одоогоор Монгол Улсын ширээний теннисний шигшээ багийн зургаан тамирчин, хоёр дасгалжуулагч олимпын наадмын бэлтгэл, сургуулилтаа хийж байна.

Ташрамд дурдахад, “Токио-2020” зуны олимпын XXXII наадамд оролцох эрхийн эзэн Б.Болор-Эрдэнэ нь өдгөө 18 настай. Тэрбээр Япон Улсын нийслэл Токио хотыг зорих Монгол Улсын Үндэсний шигшээ багийн бүрэлдэхүүний хамгийн отгон гишүүнээр нэрлэгдэж байгаа гэнэ.