“Токио-2020” зуны олимпын наадамд цуцлагдах магадлал өндөр хэвээр байгаа талаар Япон Улсын эрх баригч Либерал Ардчилсан намын Ерөнхий бичгийн дарга Тошихиро Никай “Кёодо” агентлагт өгсөн ярилцлагынхаа үеэр дурджээ.

Олимпын наадам эхлэхэд 100 хоногийн хугацаа үлдээд байгаа ч Япон даяар коронавирусийн халдварын тоо буурахгүй бол цуцлахаас өөр аргагүй болох аж.

Үүнтэй холбоотойгоор “Кёодо” агентлагаас олимпын наадмыг цуцлах эсэх талаар явуулсан санал асуулгад оролцсон 500 гаруй хүний 39.2 хувь нь тус наадмыг цуцлах, 32.8 хувь нь хойшлуулах, 24.5 хувь нь товлосон хугацаандаа зуны олимпын наадмыг эхлүүлэх боломжтой талаар саналаа өгсөн байна.

Япон Улсад өнгөрсөн 24 цагийн хугацаанд шинээр 4000 гаруй коронавирусийн халдварын тохиолдол илэрсэн өнгөрсөн нэгдүгээр сарын 28-наас хойших хамгийн өндөр тохиолдол болоод байгаа юм.

Эх сурвалж: Business Insider