“Грийн шоу” продакшн болон Монголын үндэсний бөхийн холбоо нар хамтран "Хийморь" төслийн хүрээнд улсын харцага цолтой бөхчүүдийн дунд бооцоот барилдаан зохион байгуулахаар болжээ. Уг бооцоот барилдаанд улсын харцага цолтой найман бөх буюу улсын харцага О.Хангай, Д.Анар, Ц.Одбаяр, Т.Бэгзсүрэн, Х.Гантулга, Д.Бат-Эрдэнэ, А.Цацабшир, Т.Баасанхүү нар оролцох аж. Халз барилдааныг гуравдугаар сарын 14-нд Бөхийн өргөөнд зохион байгуулна. Улсын харцага цолтнуудын дундах бооцоот барилдаан зохион байгуулагдахаас өмнө зургаан өдрийн турш бөхчүүдийн тухай реалити шоу үзэгчдэд хүрэх гэнэ. Реалити шоунд "Грийн шоу" продакшн болон "25 дугаар суваг" телевиз нар хамтран ажиллах юм

“25 дугаар суваг” телевиз: Бооцоот барилдааныг сар бүр уламжлал болгон зохион байгуулна

 Бооцоот барилдааны талаар “25 дугаар суваг” телевизийн мэдээллийн ажилтантай холбогдоход,

“Улсын харцага цолтой бөхчүүдийн дундах бооцоот барилдаан болохоос өмнө гуравдугаар сарын 8-наас эхлэн өдөр бүр бөхчүүдийн тухай реалити шоу үзэгчдэд хүрнэ. Реалити шоугаар дамжуулан үндэсний бөхчүүдийн бэлтгэл сургуулилт, хооллолт, уламжлал, ёс жудаг, соёлыг харуулах зорилготой. Харин гуравдугаар сарын 14-нд улсын харцага цолтой бөхчүүдийн дундах бооцоот барилдаан болно. Харцага цолтой найман бөхийн барилдааны даваа бүрийг сая төгрөгөөр үнэлж барилдуулна. Уг бооцоот барилдааныг бүх “IPTV”-гээр төлбөрөө төлөөд үзэх боломжтой. Цаашид энэ шоуг Японы сумо бөх шиг тогтмол уламжлал болгон үндэсний бөхийн цол бүрт тусад нь зохион байгуулна”

хэмээн мэдээлсэн юм.

Б.Батзолбоо: “Хийморь” төслийн хүрээнд монголын үндэсний бөхийн хамгийн шилдэг бөхийг шалгаруулна

Харин “Хийморь” төслийг санаачлагч “Грийн шоу” продакшны захирал Б.Батзолбоогоос тодруулахад,

“2012 оноос хойш зөвхөн үндэсний бөхийн барилдаан гэлтгүй өв соёл, үнэт зүйлсийг нь ард түмэндээ харуулж, таниулах зорилгоор “Хийморь” төслийг бичиж эхэлсэн. Энэ төсөл маань бүтэн жилийн хугацаанд үргэлжилнэ. "Хийморь" төсөл хэрэгжих энэ нэг жилийн хугацаанд бүх цолны бөхчүүдийг тусад нь барилдуулж, бүх цолноос түрүүлсэн бөхчүүдийг жилийн эцэст хооронд нь барилдуулж, монголын үндэсний бөхийн хамгийн шилдэг бөхийг шалгаруулна"

хэмээсэн юм.