“Этүгэн Ирвэсүүд” багийн довтлогч Т.Их-Уул, “ОТИС Шилүүснүүд” багийн холбон тоглогч Х.Цогтсайхан нар зуурдаар амиа алджээ. Албан бус эх сурвалжийн мэдээлснээр талийгаачид архи согтууруулах ундааны зүйл хэрэглэсэн үедээ нэгнийхээ аминд хүрч, нөгөө нь 15 давхар барилгаас үсэрч, амиа хорлосон гэх мэдээлэл бий.

Эл хэргийн талаар Цагдаагийн ерөнхий газрын Хэвлэл мэдээллийн төвийн ахлах мэргэжилтэн, цагдаагийн ахмад М.Мөнхшүрээс тодруулахад

"Амиа алдсан шалтгааныг нь тогтоохоор шалгалтын ажиллагаа үргэлжилж байгаа. Амиа алдсан сагсчидтай хамт байсан хүмүүсийг шалгаж байна. Одоо шалтгаан нөхцөл хэлэхэд арай эрт байна. Маргааш албан ёсны мэдэгдэл хийнэ"

гэв.

Талийгаач Т.Их-Уул дасгалжуулагч С.Баярцогтын удирдлага дор сагсан бөмбөгчийн замналаа эхлүүлж, “Этүгэн Ирвэсүүд” багт нэрээ дуурсгаж, Серби Улсын “Партизан” багт дуудагдаж, "Public Basketball" клубтэй гурван жилийн гэрээ байгуулан тоглож байсан. Тэрээр 15 насандаа "Спортын дэд мастер" цолны болзол хангаж, 18 насандаа "Спортын мастер" цол хүртсэн юм.

Харин талийгаач Х.Цогтсайхан анх "Сити" их сургуулийн сагсан бөмбөгийн шигшээ багт тоглож, өнгөрсөн улирлын оюутны лигийн аварга шалгаруулах тэмцээнд “ОТИС Шилүүснүүд” багаа удирдаж, мөнгөн медалийн эзэн болж байсан билээ.