Монголын үндэсний бөхийн холбооноос Сар шинийн барилдаанд 128 бөх барилдуулж, үзэгчгүй зохион байгуулах санал гаргасан ч УОК-оос дэмжигдээгүй. Үүний дараа МҮБХ-ноос Нийслэлийн Засаг дарга бөгөөд Улаанбаатар хотын захирагч, НОК-ын дарга Д.Сумъяабазарт хүсэлт гаргасан билээ. Тус хүсэлтэд Цагаан сарын барилдааныг Говь-Алтай аймагт зохион байгуулах санал гаргасан бөгөөд “Барилдах бөхчүүд болон ажиллах жаяг дэгийн баг болох нийт 190 хүний тусгаарлах байр, хоол, бусад зардлыг шийдвэрлэсэн. Орон нутагт зохиогдох барилдааны бүх зардлыг МҮБХ бүрэн хариуцна. Нислэгийн хоёр онгоцны захиалгыг өгсөн байгаа болно” хэмээсэн юм.

       Тэгвэл тус холбооноос Цагаан сарын барилдаан зохион байгуулах боломжгүй болсон талаар мэдээллээ. Уг мэдээлэд "Сар шинийн барилдаан цар тахлын улмаас Улаанбаатар хот болон орон нутагт зохион байгуулагдах боломжгүй боллоо. Даяаршлын өнөө үед монголчууд бусдаас ялгагдах өв соёл, уламжлалаа хадгалж, хойч үедээ өвлүүлж байх нь бид бүгдийн үүрэг бөгөөд энэхүү өв соёл, уламжлалаасаа аажмаар холдож, бүх талаараа дэлхийн хамгийн хоцрогдсон, дорой буурай үндэстний хэв шинжийг улам бүрдүүлсээр байгаа нь харамсалтай.

Төрт ёсны уламжлалт Сар шинийн барилдааныг зохион байгуулахыг дэмжиж ажилласан Нийслэлийн онцгой комисс, “Аеро Монголиа” ХХК, “Хүннү Айр” ХХК болон бөхийн барилдааныг тасалдуулахгүйн тулд орон нутагтаа зохион байгуулах санал гаргасан Говь-Алтай, Өмнөговь, Булган аймгийн ЗДТГ, Увс аймгийн Үндэсний Бөхийн салбар холбоондоо, мөн бөхчүүддээ гүн талархал илэрхийлье.

Та бүхэн сар шинэдээ сайхан шинэлээрэй" гэжээ.