Коронавирусийн цар тахалтай холбоотойгоор УОК-оос Цагаан сарын баярыг тэмдэглэхгүй байх чиглэл өгсөн. Харин Монголын үндэсний бөхийн холбооноос Цагаан сараар халдвар хамгааллын дэглэмийг сайтар сахиж, 128 бөхийн барилдаан зохион байгуулна хэмээн мэдэгдсэн юм. Ингэхдээ эцсийн шийдвэрийг коронавирус болон голомтын судалгаан дээр үндэслэн УОК-оос өнгөрсөн нэгдүгээр сарын 25-нд гаргах ёстой байлаа.

       Гэвч Засгийн газар бүрэн бүрэлдэхүүнээрээ огцорч, шинэ Засгийн газар байгуулагдсанаар барилдааныг зохион байгуулах эсэх нь тодорхойгүй болсон юм. Иймээс холбогдох байгууллагад  дахин хүсэлт тавина хэмээн албаныхан мэдээлж байлаа. Тэгвэл барилдаан зохион байгуулах шийдвэр гарсан эсэх талаар Монголын үндэсний бөхийн холбооны дэд тэргүүн Ц.Магалжаваас тодруулахад

“Одоог хүртэл Цагаан сарын барилдаан зохион байгуулах шийдвэр гараагүй л байна. Шийдвэрийг УОК-оос удахгүй гаргана гэж надад мэдээлсэн”

гэв.