Холбоодын нэгдсэн УАШТ-ийн гар бууны холимог багийн тэмцээний аваргаар “Алдар” спорт хорооны баг тодорч, өнгөрсөн жилийн амжилтаа давтлаа. Өнгөрсөн жилийн хүрэл медалийн эзэн “Хилчин” спорт хорооны баг финалд тэдэнтэй тун ширүүн үзэлцэж, мөнгөн медаль дээр буув. Финалын цуврал буудлага 14:14 болон тэнцэж, сүүлийн сумаар ялагчийг тодруулах эгзэгтэй мөчид “Алдар”-ын хоёр буудагч 19.9 оноо (Э.Даваахүү 10.7, Г.Хэрлэнцэцэг 9.2) авсан бол “Хилчин”-ийнхэн 19.8 оноо (А.Буяндэлгэр 10.2, Э.Бадамгарав 9.6) авсан юм.

     Ийнхүү 0.1 оноогоор илүүрхсэн “Алдар”-ынхан аварга цолоо хамгаалллаа. ОУХМ Э.Даваахүү эрэгтэй ганцаарчилсан төрөлд түрүүлээд байсан бол холимог багийн тэмцээнд аваргалснаар энэ УАШТ-ийг хос алтан медальтайгаар өндөрлүүлэв. Хүрэл медалийг О.Төгөлдөр, Э.Номин нарын бүрэлдэхүүнтэй “Аварга” баг хүртсэн. Тэд медалийн төлөөх буудлагад “Том босс” клубийг 16:14-өөр хожсон юм.

Хийн гар бууны холимог багийн дүн:

1.”Алдар” спорт хороо алтан медаль. (Г.Хэрлэнцэцэг, Э.Даваахүү)

2.”Хилчин” спорт хороо мөнгөн медаль. (Э.Бадамгарав, А.Буяндэлгэр)

3.”Аварга” клуб хүрэл медаль. (Э.Номин, О.Төгөлдөр).