Хөл бөмбөгийн идэрчүүдийн  ДАШТ аравдугаар сарын 16-аас арваннэгдүгээр сарын 3-ны өдрүүдэд болов. ”U17”  хүртэлх насны эмэгтэй хөл бөмбөгчдийн дэлхийн аварга шалгаруулах тэмцээн Доминикан Улсад явагдаж өндөрлөлөө.

        Энэхүү тэмцээний хошой аварга Хойд Солонгос буюу БНАСАУ-ын шигшээ хэсгийн шатнаа Мексикийн багийг 4:1-ээр, Кенийн шигшээг 3:0-ээр, Английн шигшээг 4:0-ээр хожсон. Улмаар шигшээ наймд Польшийн багийг, хагас шигшээд Америкийн шигшээг тус бүр 1:0-ээр буулган авч “U17”  хүртэлх насныхны ДАШТ-д дөрөв дэхээ финалдав.

       Сар гаруйхны өмнө Хойд Солонгосын “U20”  хүртэлх насныхны баг ДАШТ-д түрүүлсэн бол энэхүү амжилтын буухиаг тус улсын “U17” хүртэлх насныхны баг үргэлжлүүллээ. Тэд аваргын төлөө сүүлийн хоёр ДАШТ-д дараалан түрүүлээд буй Испанийн шигшээ багтай тоглож, торгуулийн цохилтоор буулгаж авав.

      Ийнхүү Хойд Солонгосын хөл бөмбөгчид “U17” хүртэлх насныхны ДАШТ-д гурвантаа түрүүлсэн анхны баг боллоо. Хойд Солонгосын хөл бөмбөгчин Жон Ил Чонг ДАШТ-ий “Шилдэг тоглогч”-оор тодорч “Алтан бөмбөг” шагналыг гардав. Харин энэхүү тэмцээний мэргэн буучаар Испанийн Пау Комендадор шалгарлаа.