Катар Улсын Доха хотод зохион байгуулагдаж буй “Мастерс-2021” тэмцээний эхний өдрийн барилдаанаас МУГТ М.Уранцэцэг хүрэл медаль хүртсэн билээ. Харин тус тэмцээний хоёр дахь өдөр манай орны таван тамирчин дөрвөн жинд хүч үзсэн боловч медальгүй хоцорлоо. Ийнхүү “Доха Мастерс-2021” тэмцээний хоёр дахь өдөр барилдсан Монголын баг, тамирчдын оноолт, дүнг тоймлон хүргэж байна.

       -Тус тэмцээний хоёр дахь өдрийн барилдааны салхийг хагалж, эрэгтэйчүүдийн -81 кг жинд манай жүдоч О.Ууганбаатар хоёр тойргийн туршид сайн барилдаж, цэвэр ялалт байгуулсан ч гуравдугаар тойрогтоо Үзбекстаны тамирчин Ш.Болтабоетод унаснаар тэмцээнээ дуусгасан.

        -Эрэгтэйчүүдийн төрлийн -73 кг жинд ДАШТ-ий хүрэл, “Мастерс” тэмцээний мөнгөн медальт Г.Одбаяр Япон Улсын тамирчин Сойчиро Хашимототой учраа таарч, ялагдал хүлээв.

        -Өнөөдрийн барилдааны эмэгтэйчүүдийн төрөлд ганцаараа орсон ОУХМ Б.Ганхайч -63 кг жингийн эхний тойрогт “Их Дуулга” тэмцээний алтан медальт Дарья Давыдовад унаж, тэмцээнээ өндөрлүүллээ.

         -ДАШТ-ий хошой мөнгөн медальт, ОУХМ Ц.Цогтбаатар эрэгтэйчүүдийн төрлийн -73 кг жингийн хоёрдугаар тойрогт Үзбекстаны тамирчин Х.Тураевтай учраа таарч, ялагдлаа.

         -Харин өнөөдрийн барилдаанд өндөр хүлээлттэй орсон С.Моллай эрэгтэйчүүдийн төрлийн -81 кг жингийн гуравдугаар тойрогт Гүрж Улсын тамирчин Шамил Боршашвилид унаж, тэмцээнээ өндөрлүүллээ.