“Мастерс-2021” тэмцээний шувтаргад МУГТ М.Уранцэцэгтэй учраа таарч, цэвэр ялалт байгуулсан Украин Улсын тамирчин Дариа Билодид гэж яг хэн бэ. Үзэсгэлэнт төрх, бие хаагаараа төдийгүй жүдогийн спортод гаргасан амжилтаараа олны анхаарлын төвд байдаг тамирчин бүсгүйн сонирхолтой мэдээллүүдийг хүргэе.

Жүдо зөвхөн эрчүүдийн спорт биш

       МУГТ М.Уранцэцэгийг цэвэр ялсан Дариа Билодид ДАШТ, Европын аварга шалгаруулах тэмцээний хошой аварга. 2018 онд Азербайжаны Баку хотод зохион байгуулсан ДАШТ-д 17 насандаа түрүүлж, уг хэргэмийг хамгийн залуудаа хүртсэн амжилтыг шинэчлэн тогтоосон. Өдгөө 20 настай Дариа -48 кг жинд эмэгтэйчүүдийн төрөлдөө дэлхийн чансааг тэргүүлж байна.

       Дариа Билодид 2017 онд Нидерланд Улсад зохион байгуулсан “Grand Prix”-д тэргүүлснээсээ хойш жүдогийн есөн том наадамд дараалан түрүүлж, “Ялагдашгүй аварга” хэмээх хочийг авч, уг спортыг сонирхогчдын сэтгэл зүрхэнд хоногшжээ.

       Түүний эцэг, эх нь мөн жүдогийн спортын тамирчин. Тэд Дариаг зургаан настайдаа кимоно өмссөн цагаас нь хойш дасгалжуулж, татами дээр жүдогийн спортын “акул”-уудын эсрэг хүчирхэгээр тэмцэх, өрсөлдөх нэгнийг бүтээсэн билээ.

       Дариа Билодид Олимпын сувагт өгсөн ярилцлагадаа “Жүдо зөвхөн эрчүүдийн спорт биш” гэсэн нь түүнийг спорт сонирхогчдын дунд “Жүдогийн сахиусан тэнгэр” хэмээх нэрэнд хүргэсэн байна.

      Тэрбээр жүдогийн спортоор хичээллээгүй бол Холливудын од болох байсан гэнэ. Жүдогийн спортын амжилтаа гайхалтай үргэлжлүүлэхийн зэрэгцээ гадаад төрхөөрөө олны анхаарлыг татсан түүнд дургүй эрэгтэй жүдогийн хорхойтон байдаггүй. Гэвч жүдогийн спорт дахь сахиусан тэнгэр Дариа өнгөрсөн жил Итали Улсын тамирчин, Олимпын аварга Фабио Базилтай болзож байсан нь түүнийг шалгуур өндөртэй хатуу “самар” болохыг эрэгтэй дэмжигчдэд нь ойлгуулсан аж.