Жүдо бөхийн “Мастерс-2021” тэмцээн өнөөдрөөс эхлэн гурван хоног үргэлжлэх билээ. Тус тэмцээний эхний өдрийн хуваарийн таван жинд Монгол Улсаас МУГТ М.Уранцэцэг тэргүүтэй есөн бөх барилдлаа. “Мастерс-2021” тэмцээнд барилдаж буй Монголын баг, тамирчдын өнөөдрийн оноолт, дүнг нэгдсэн байдлаар танилцуулж байна.

       -Өнөөдрийн эхний барилдаанд эмэгтэйчүүдийн -48 кг-ын жинд “Мастерс-2019” тэмцээний мөнгөн медальт Г. Наранцэцэг Африк тивийн хошой аварга Г.Уайтбойтой учраа таарч, ялалт байгуулсан боловч хоёрдугаар тойрогт Португалийн К.Костад ялагдаж, тэмцээнээ өндөрлүүллээ.

          -Эрэгтэйчүүдийн -66 кг-ын жинд “Мастерс”-ийн хүрэл медальт Ё.Басхүү Африк тивийн дөрвөн удаагийн аварга Египт Улсын тамирчин М.Абделмавгог давж, цэвэр ялалт байгуулсан байна.

        -Эмэгтэйчүүдийн -52 кг-ын жинд залуучуудын Олимпын мөнгөн медальт, Дэлхийн аварга Л.Сосорбарам “Лондон-2012” Олимпын наадмын хүрэл медальт Белги Улсын тамирчин Ч.Вантай учраа таарч, ялагдал хүлээн тэмцээнээ өндөрлүүлсэн.

          -Эрэгтэйчүүдийн -66 кг-ын жинд “Мастерс” тэмцээний алт, мөнгөн медальт Г.Хэрлэн “С” хэсгийг тэргүүлэв.

         -Эмэгтэйчүүдийн -57 кг-ын жинд өнгөрсөн оны Дюсселдорфийн Их дуулгын хүрэл медальт Б.Хорлоодой залуучуудын ДАШТ-ий мөнгөн медальт Израилийн Г.Примог нэмэлт цагт буулган авлаа.

       -Мөн тус жинд Олимпын наадмын мөнгөн медальт, Дэлхийн аварга, “Мастерс” тэмцээний дөрвөн удаагийн аварга МУГТ Д.Сумъяа Руми Улсын тамирчинтай учраа таарч, цэвэр ялалт байгууллаа.

           -Эрэгтэйчүүдийн -60 кг-ын жинд залуучуудын Дэлхийн аваргын хүрэл медальт Л.Өнөболд эхний тойрогт ялалт байгуулж, хоёрдугаар тойрогт АНУ-ын А.Диазыг цэвэр яллаа.

          -Харин Дэлхийн аваргын мөнгө, “Мастерс”-ийн гурван удаагийн хүрэл медальт МУГТ Д.Амартүвшин “С” хэсгийг тэргүүлэн барилдаж буй Испанийн тамирчин Ф.Гарригост ялагдаж, тэмцээнээ дуусгав.

         -Эмэгтэйчүүдийн -48 кг-ын жинд Дэлхийн аваргын иж бүрэн медальт, “Мастерс” тэмцээний алт, хүрэл медальт МУГТ М.Уранцэцэг эхний тойрогт ялалт байгуулж, хоёрдугаар тойрогт ОХУ-ын И.Долговатай барилдах байсан ч И.Долгова дэвжээн дээр гарч ирээгүй тул М.Уранцэцэгт ялалтыг өгсөн байна.

         -Улмаар хагас шигшээд МУГТ М.Уранцэцэг Украйны Дариа Билодидод унаж хүрэл медалийн төлөө Франц Улсын тамирчин М.Клементтэй учраа таарч, хүрэл медалийн болзол хангасан билээ.

          -Эрэгтэйчүүдийн -66 кг жинд "Мастерс"-ийн алт, мөнгөн медальт Г.Хэрлэн хүрэл медалийн төлөө ОХУ-ын А.Григоряантай учраа таарч, ялагдал хүлээж "Мастерс-2021" тэмцээний тавдугаар байрт шалгарлаа.