Хүн төрөлхтний эв нэгдэл, амар амгалан байдалд спорт, олимпын хөдөлгөөн чухал нөлөөтэй. Тиймээс олимпын хөдөлгөөнийг дэлхийн хамгийн том хөдөлгөөн  гэж үздэг. Өөрөөр хэлбэл таван тивийн 206 гишүүн орон таван цагаригт туган дор нэгдэж олимпын наадамд оролцдог. Түүнчлэн олимпизм дэлхийн нийтийн энх тайван байдалд чухал нөлөө үзүүлсээр ирсэн.

Монгол Улс нь 1964 оноос эхлэн олимпын наадамд оролцож эхлэсэн бөгөөд үүнээс хойш бараг бүхий л зуны олимпод оролцсон. Харин 1984 онд ОХУ буюу тэр үеийн ЗХУ-ын санаачилгаар социалист орнууд  “Лос Анжелес-1984” олимпыг бойкотолсноор Монгол Улс 1984 оны зуны олимпод оролцоогүй юм.

Монголын үндэсний олимпын хороо 1956 онд байгуулагдаж 1961 онд  НҮБ-ын гишүүн болсоны дараа 1962 онд Олон улсын олимпын хороо хүлээн зөвшөөрч гишүүн болгосон түүхтэй.

1964 оны Токиогийн олимпын наадамд Монгол Улс анх оролцож чөлөөт бөх, буудлага, хөнгөн атлетик, дугуй, спортын гимнастикийн төрөлд нийт 21 тамирчин хурд, хүчээ сорьж байв.

1968 онд 16 тамирчин Мексик Улсын Мехико хотод болсон олимпын наадмаас чөлөөт бөхийн 87 кг-ын жинд Ж.Мөнхбат мөнгөн медаль , 57 кг-ын жинд Ч.Дамдинбазар, 70 кг-ын жинд Д.Сэрээтэр, 78 кг-ын жинд Т.Артаг нар хүрэл медаль хүртэж, 112 орон оролцсон тус олимпоос Монгол Улс 27 дугаар байрт орж байжээ.

1972 оны Мюнхены олимпод 41 тамирчин явж, чөлөөт бөх, жүдо бөхийн төрөлд  хоёр мөнгөн медаль хүртсэн ч сэргээшийн төрлийн эм, бэлдмэлээс болж, 60 кг-ын жинд мөнгөн медаль авсан Б.Буядаагийн медалийг хүчингүй болгож, чөлөөт бөхийн 100 кг-ын жинд Х.Баянмөнх мөнгөн медаль авч 121 орноос 36 байрт орсон.

1976 оны Монреалын олимпод 33 тамирчин оролцож нэг мөнгөн медалийг чөлөөт бөхийн 62 кг-ын жинд З.Ойдов хүртэж, шагналт байрт дөрвөн тамирчин орсон амжилтаар 92 орноос 35 дугаар байрт жагссан байна.

1980 оны Москвагийн олимпын наадамд 43 тамирчин оролцож хоёр мөнгөн медалийг чөлөөт бөхийн 74 кг-ын жинд Ж.Даваажав,  жүдо бөхийн 65 кг-ын жинд Ц.Дамдин, хоёр хүрэл медалийг чөлөөт бөхийн 57 кг-ын жинд  Д.Оюунболд, жүдо бөхийн 71 кг-ын жинд Р.Даваадалай нар хүртэж, таван тамирчин шагналт байр эзэлсэн амжилтаар 80 орноос 22 дугаар байрт орсон юм. Тус олимпод хөрөнгөтний гэгдэх орнууд оролцоогүй.

1984 оны АНУ-ын Лос-Анжелес хотноо болсон 23 дугаар олимпын наадамд хуучнаар социалист системийн орнууд оролцоогүйгээс манай тамирчид Лос-Анжелес хотыг зориогүй юм.

1988 оны Сөүлийн олимпын наадамд манай 28 тамирчин оролцож нэг хүрэл медалийг боксын 60 кг-ын жинд Н.Энхбат, албан бус самбо бөхийн төрөлд мөнгөн медалийг С.Эрхэмбаяр авч байжээ.  дөрвөн тамирчин шагналт байрт шалгарч, 159 орноос багийн дүнгээр 47-д оржээ.

1992 оны Барселоны олимпод 33 тамирчин явснаас хоёр хүрэл медалийг боксын 60 кг-ын жинд Н.Баярсайхан,  буудлагын гар бууны 25 м-ийн дасгалд Д.Мөнхбаяр нар хүртэж, шагналт байрт хоёр тамирчин орсноор тус олимпод оролцсон 169 орноос 48 дугаар байр эзэлсэн.

1996 оны Атлантын олимпын наадамд 18 тамирчин оролцож жүдо бөхийн 60 кг-ын жинд хүрэл медалийг Д.Нармандах хүртэж 179 орноос 71 дүгээр байрт оржээ.

2000 оны Сиднейн олимпод 20 тамирчин оролцож буудлагын тамирчин О.Гүндэгмаа шагналт байр эзэлж, манай тамирчдын олимпын наадамд 1964 онд анх удаа оролцохдоо медаль хүртээгүй шиг Сиднейгээс ганзага хоосон ирснээр 199 орноос 150 дугаарт орж сүүл мушгисан байдаг.

2004 оны Афины олимпын наадамд Монголын багийн цорын ганц хүрэл медалийг жүдо бөхийн 60 кг-ын жинд Х.Цагаанбаатар хүртсэн.

2008 оны Бээжингийн олимпын наадамд нийт 28 тамирчин оролцож жүдо бөхийн -100 кг-д Н.Түвшинбаяр, боксын 54 кг-ын жинд Э.Бадар-Ууган нар Монголын баг тамирчдын түүхэн дэх анхны алтан медалийг хүртсэн. Мөн 25 метрийн спорт гар бууны төрөлд О.Гүндэгмаа, боксын 48 кг-ын жинд П.Сэрдамба мөнгөн медаль хүртэж гайхалтай амжилт гаргаж байсан түүхтэй.

2012 оны Лондоны олимпын наадамд жүдо бөхийн -100 кг-ын жинд олимпын аварга Н.Түвшинбаяр мөнгөн медаль хүртэж, Монгол Улсаас анх удаа олимпын хос медальтан болсон. Боксын 52 кг-ын жинд Н.Төгсцогт мөнгө, жүдо бөхийн 73 кг-ын жинд С.Ням-Очир, чөлөөт бөхийн 63 кг-ын жинд С.Батцэцэг, боксын 64 кг-ын жинд У.Мөнх-Эрдэнэ нар хүрэл медаль хүртэж монголчууд олимпын наадмаас анх удаа хамгийн олон буюу таван медальтай ирсэн юм.

2016 оны Рио-де-Жанейрогийн олимпын наадамд жүдо бөхийн 57 кг-ын жинд Д.Сумъяа мөнгө, боксын 60 кг-ын жинд Д.Отгондалай хүрэл медаль хүртсэн билээ.

2020 оны Токиогийн олимпын наадамд спортын найман төрлөөр хурд, хүч, ур чадвараа сорих 38 эрхийн болзлыг хангаж 43 тамирчинтай оролцсон. Энэ олимпын наадмын жүдо бөхийн 81 кг-ын жинд Сайд Моллай мөнгөн медаль, 48 кг-ын жинд М.Уранцэцэг, 73 кг-ын жинд Ц.Цогтбаатар, чөлөөт бөхийн 53 кг-ын жинд Б.Болортуяа хүрэл медаль хүртсэн билээ.

Монголын баг тамирчид зуны олимпын наадмаас хоёр алт, 11 мөнгө, 17 хүрэл, нийт 30 медаль аваад байна. Монголчууд олимпын наадмаас жүдо бөх, чөлөөт бөх, бокс, буудлага гэсэн топ дөрвөн спортын төрлөөр медаль хүртээд байгаа. Одоогийн байдлаар Монгол Улсын жүдо бөхийн тамирчид олимпоос 11, чөлөөт бөхийн тамирчид 10, боксчид долоо, буудлагынхан хоёр медаль хүртээд байна.

Олимп, дэлхийн аваргаас медаль хүртсэн тамирчдыг сар бүр урамшуулах зарлигийг 2012 онд тухайн үеийн Монгол Улсын Ерөнхийлөгч Ц.Элбэгдорж гаргаж, Монгол Улсын Ерөнхий сайд Н.Алтанхуягийн Засгийн газар хэрэгжүүлсэн түүхтэй. Өнгөрсөн онд л гэхэд 67 тамирчин сард 154 сая төгрөг, жилд 1.848 тэрбум төгрөгийн мөнгөн урамшуулал хүртжээ. Харин  өнгөрсөн 2023 оны Засгийн газрын хуралдаанаар олимп, паралимпын наадам, дэлхийн аварга шалгаруулах тэмцээн болон бусад спортын наадам, тэмцээнд амжилт гаргасан тамирчин, түүний дасгалжуулагч нарт Засгийн газраас олгогддог мөнгөн шагнал, сар бүрийн урамшууллыг ёс зүйн дүрэм болон хуулийн хариуцлага хүлээсэн тамирчин, дасгалжуулагч нарт олгохгүй байх зохицуулалтыг шинээр тусгасан