Америкийн үндэсний сагсан бөмбөгийн холбооны “Хьюстон Рокетс” багийн супер од Жеймс Хардэнд 50 мянган ам.долларын торгууль ногдууллаа. Тодруулбал, өнгөрсөн даваа гарагт нууцаар зохион байгуулсан үдэшлэгт Жеймс Хардэн оролцсон бөгөөд түүнийг лигээс гаргасан эрүүл мэнд, аюулгүй байдлын протоколыг зөрчсөн хэмээн үзсэн байна.

       Лигийн бүх баг, тоглогчдын зөвшөөрсөн эрүүл мэнд, аюулгүй байдлын протоколыг зөрчиж, хариуцлагагүй хандсан “Улирлын хамгийн үнэ цэнтэй тоглогч”-ийн шагналт Жеймс Харденд 50 мянган ам.долларын торгууль ногдуулж, өнөөдрийн “Оклахома Сити Тандер” багийн эсрэг тоглох тоглолтыг цуцалжээ. Хэрэв ирэх бямба гарагт “Портланд Трейл Блейзерс” багийн эсрэг хийх тоглолтыг цуцлахаар болбол Жеймс Хардэнд лигийн үйл ажиллагаанд тасалдал учруулсан хэмээн 567 мянган ам.долларын торгууль ногдуулах юм.